Аҟәа. Жьҭаарамза 4, 2022 шықәса. Аԥсныпресс. Аԥызы-министр Алеқсандр Анқәаб Урыстәылатәи Афедерациа Жәлар рартистка, Игорь Моисеев ихьӡ зху Аҳәынҭқарратә академиатә ансамбль (Игор Моисеев ибалет) асахьаркыратә напхгаҩы Елена Шьербакова дылԥылеит, ҳәа иаанацҳауеит аминистрцәа Реилазаара аофициалтә саит.
Адунеизегь еицырдыруа абалет аколлектив 85-шықәса ахыҵра инамаданы иаԥҵоу апрограмма ҷыда ала Аԥсны агастрольқәа мҩаԥнагоит. Уи иқәгылараны иҟоуп Р.Д.Гәынба ихьӡ зху аҳәынҭқарратә филармониа асцена аҿы.
Агастролқәа урыстәылатәи абинесмен, амеценат Алишер Усманов иаԥиҵаз «Аҟзара, анаука, аспорт» ҳәа хыс измоу Агәыҳалалратә фонди Аԥсны акультура аминистри раԥшьгарала имҩаԥысуеит.
Алеқсандр Анқәаб Елена Шьербакова иҭабуп ҳәа леиҳәеит лара Аԥсны ҷыдала дахазыҟоу азы.
«Ҳара хаҭала шәареи напхгара зышәҭо зыхьӡ акыр инаҩхьоу аколлективи есымшагьы абара ҳазыԥшуп, уи гәахәара дула иҳадаҳкылоит. Даара пату ақәаҳҵоит Шәара ҷыдала Аԥсны шәахьазыҟоу, аҟыбаҩ ду злоу Игорь Моисеев ибалет аныҳәа иаҩызоу ақәгылара Аԥсны ирбартә еиԥш аҟаҵара ахьшәылшәыршаз азы иҭабуп ҳәа шәаҳҳәоит», - ҳәа асас дидкыло иҳәеит атәыла аԥыза-министр.
