Асҭамыр Логәуа иара убас аԥсшьаҩцәа дрыҿцәажәеит. Атуристцәа Аԥсны рыҟазаара ирызцәырнаго ацәаныррақәа ирылацәажәеит, обиектқәас изҭаахьоу, изҭаарц ргәы иҭоу, уҳәа иазааҭгылет. Ҷыдала иазгәарҭон аԥсабара аԥшӡара, аҳауа азҩыдара, аҭыԥантәи ауааԥсыра рысасдкылара. Убас, Воронежынтәи иаас асас ҩыџьа рзы апутиовка лара 65 нызықь илызтәеит ҳәа иазгәалҭеит (аҳаирпланла аара ахәԥса уахь иналамҵакәа). Лара лыԥсшьара шымҩаԥысуа лгәаԥхоит, насгьы Аԥсны аԥсшьаразы хра злам азгәаҭарақәа аиаша иацәыхароуп ҳәа илыԥхьаӡоит.
«Асезон бзианы иалагеит, иуадаҩу агеополитикатә ҭагылазаашьа шыҟазгьы. Аха, аҵыхәтәантәи амчыбжьқәа рзы иаабо апроблемақәа ыҟоуп. Ҳара хылаԥшрада иаанхаз алақәа, аҟьамсар зну амҩадуқәеи аԥшаҳәеи рзы азашшрақәа ҳауеит. Ақалақь Ахадара ахылаԥшра аҵаҟа иҟоу ақалақь аԥшаҳәа аҭагылазаашьа бзиоуп, аха ԥыхьатәи арратә санаториақәа рҵакыраҿы иҟоу аплиажқәа ишахәҭоу ирыцқьатәуп. Ҭыԥқәак рҿы ацрыӡмҩангара апроблемақәа рыӡбара иадҳәалоу аусурақәа мҩаԥысуеит, аха урҭ еиҳа ирццактәуп. Ҳара 2025 шықәсатәи аԥхынтәи акурорттә сезон ҳҭалахьеит, уи уажәаԥхьагьы ҳазыҟаҵазар акәын», – ҳәа инаҵшьын иазгәеиҭеит аминистр.
