Ҳаамҭа иақәшәо авидеонаԥшра акамерақәа рышьақәыргылара Аԥсны мрагыларатәи ахәҭа аҿгьы иазԥхьагәаҭоуп.
Аԥыза-министр, амҩатә ԥҟарақәа реилагара шьақәзыргыло афото-видео камерақәа рышьақәыргылара иадҳәалоу аусура аҿы зегьы реиҳа ихадоу – амҩа-транспорттә машәыртә хҭысқәа рыԥхьырҟәҟәаара ауп ҳәа инаҵшьны иазгәеиҭеит.
«Авидеокамерақәа – ари Автоҳәынҭинспекциа аусзуҩцәа рыла иаалырҟьаны амҩатә ԥҟарақәа реилагара ашьақәыргылара акәыӡам, уи амашьынарныҟәцаҩцәа амҩатә ԥҟарақәа еиларымгарц, рхаҭақәа рыԥсҭазаареи амҩа иану егьырҭ рыԥсҭазаареи ашәарҭара иҭадмыргыларц азы агәҽанызаара иадҳәалоу ауснагӡатәқәа роуп», - ҳәа иҳәеит Владимир Делба.
Аиԥылараҿы иара убас атәыла аҩныҵҟатәи аусқәа Рминистрра аусура иадҳәалоу егьырҭ азҵаарақәа жәпакы ирылацәажәеит.
