Акциа иҷыдоу аҟазшьа анаҭеит акассақәа рҿы игылаз «амедиатә иаҵәахәқәа»: аҳақьымцәа, ажурналистцәа, афонд «Ашана» аҩызцәеи апартниорцәеи.

Сынтәа Ареспублика Аԥсны ахәыҷы изинқәа рыхьчаразы аҷыдалкаатә зинмчы змоу, аамҭак ала Афонд «Ашана» адиректор Мактина Џьынџьалԥҳа  хаҭала «кассирс» аҟалареи агәыҳалалразы аԥаратә хархәагақәа реизгара алахәхареи рзы алшара лоуит.

«Рашәарамза 1 азы акартош фри, мамзаргьы жәытә ҵасла иҟаҵоу акартош аазхәаз зегьы рыбзоурала, сынтәа агәыҳалалратә еизгара аицҵалыҵ уаҩ иимбац ала идухеит – 174 380 мааҭ! Ари арекордтә еицҵалыҵхеит иарбоу акциа амҩаԥгара ашықәсқәа зегьы рзы, ас еиԥшҵәҟьа иҟалоит ҳәа аӡәгьы дақәгәыӷуамызт, уи иаанагогьы ақьиареи аразреи имариоу, аха агәахәара зцу аусқәа рыла ицәыргазаргьы ауеит ҳәа ауп», - ҳәа адырра ҟанаҵоит ахәыҷқәа ромбудсмен Иаппарат.

Иқьиоу традициала ишышьақәгылахьоу еиԥш, ирҳаз аԥаратә хархәагақәа зегьы «Акультура-гәыҳалалратә Фонд «Ашана» ахь ииагоуп, урҭ ӷәӷәала ичмазаҩу Аԥсны ахәыҷқәа рыхәышәтәразы идәықәҵахоит.