«Атурист изы акырӡа аанагоит раԥхьа иргыланы атранспорттә ҭагылазаашьақәа  рыманшәалареи аԥсшьараҭыԥ аҟынӡа ибзианы анаӡареи. Аҳаирбаӷәаза аартра, ацҳа аиҭашьақәыргылара, аихамҩатә еимадара аартра – ари зегьы жәаҳәарада Аԥсныҟа иаауа атуристцәа рхыԥхьаӡара ацҵара хра злоу анырра анаҭоит. Азԥхьагәаҭара уақәгәыӷуа иҟаӡам рҳәоит. Ҳәарада, ҳара аԥхынтәи ашьхатә сезон ала аҭаара азы аихшьаалақәа ҟаҳҵоит. Аха сара агәра ганы сыҟоуп иҳаҩсхьоу ашықәсқәа ирҿырԥшны сынтәа аԥсшьаҩцәа рхыԥхьаӡара шеиҳахо», - ҳәа Бадра Гәынба иажәақәа аанагоит ТАСС.

Аҳәынҭқарра Ахада инаҵшьны иазгәеиҭеит Аԥсны аҵыхәтәантәи ашықәсқәа рзы аинфраструктура активла аҿиара ишаҿу, атуристтәии ақыҭанхамҩатәи уахь иналаҵаны. Ареспублика аҿы иаатуеит атуристцәа рыдкылара иазку аобиект ҿыцқәа, анаплакқәа аусура иалагоит.

«Жәаҳәарада, уи зегьы хра злоу анырра анаҭоит ареспублика иаҭаауа атуристцәеи аԥсшьаҩцәеи рхыԥхьаӡара ацлара», - ҳәа иҳәеит иара.