Аҟәа. Цәыббрамза 30, 2022 шықәса. Аԥсныпресс. Аԥсны Жәлар Реизара-Апарламент Аиҳабы Лаша Ашәба Аԥсны жәлар Аиааиреи Ахьыԥшымреи Рымшныҳәа рыдиныҳәалеит.
Адныҳәалараҿы, ахәҭакахьала иазгәаҭоуп:
«Ҳаҭыр зқәу сыуаажәлар! Аԥсны Жәлар Реизара-Апарламент ахьӡала ишәыдысныҳәалоит Аԥсны Аҳәынҭқарра Аиааиреи Ахьыԥшымреи Рымшныҳәа!
Аԥсны иҿыцӡоу аҭоурых аҿы ари аныҳәа иҷыдоу аҭыԥ ааннакылоит. Ҳҳәынҭқарра аҭоурых ианылеит 1992–1993 шш. Аџьынџьтәылатә еибашьра 413 фырхаҵаратә мшы.
Ахақәиҭреи ахьыԥшымреи хәы змам ҳажәлар ршьала икәабоуп. Зықьҩыла Аԥсны аԥацәеи аԥҳацәеи, ҳажәлар ашәарҭара ду ианҭагыла иҳацхраарц хатәгәаԥхарала иааз ҳашьцәеи Ҳаԥсадгьыл ахьчара рхы ақәырҵеит. Хара наунагӡа ҳгәалашәараҿы иаанхоит рыжәҩахыр еибыҭа аӷа хәымга иҿагыланы еибашьуаз, Аиааира зхы ақәызҵаз афырхацәа», - ҳәа иаҳәоит адныҳәалара аҿы.
Адепутатцәа реилазаара зегьы ахьӡала Лаша Ашәба аветеранцәа дрыдныҳәало уажәы иҟоу аҿари еиҵагылараны иҟоу абиԥареи аҭынч ԥсҭазаараҿы инхартә-инҵыртә, иҿиартә еиԥш алшара ахьрырҭаз азы иҭабуп ҳәа реиҳәеит.
«Аҳәынҭқарра ахықәкы хаданы иҟоуп – 1992–1993 шш. Аԥсны жәлар рџьынџьтәылатәи еибашьра аветеранцәеи урҭ рҭаацәеи, иара убас аибашьраҿы иҭахаз рҭаацәеи рганахьала ҷыдала агәцаракра аарԥшра.
Иахьа Аԥсны Аҳәынҭқарра аԥсҭазаара аусхкқәа зегьы рҿы аҿиара иаҿуп. Агәра ганы ҳаҟоуп аҭынчреи аҭышәынтәалареи рыхьчара шҳалшо, иара убас ҳажәлари ҳҳәынҭқари ирымоу алшарақәа хра злоу ахархәара шаиуо.
Ҳреспублика есааира иӷәӷәахалааит, ишәҭыкакаҷлааит! Аныҳәа ду шәадныҳәалаз, ҳаҭыр зқәу сыуаажәлар!» – ҳәа иаҳәоит адныҳәалара атекст аҿы.
