Алықьса Гогәуа ипроза акы иаламҩашьо иҟазҵо акакәны иҟоуп апоет иҟазара, ихәыцра ҵаула, ипсихологизм, ижәлар рлахьынҵа азы агәыбылра, уҳәа. Урҭ анылеит аԥсышәалеи урысшәалеи хазы иҭыҵыз ашәҟәқәа рҟны.
Алексеи Гогәуа иара убас деицырдыруеит апублицист иаҳасабала. Иара икалам иҵыҵыз аочеркқәа, астатиақәа, аессе зеиӷьаҟам ала ирныԥшуеит ихатәы бызшәа, иԥсадгыьл аҭоурых, ижәлар ркультура, уҳәа рҿы иҟоу апроблемақәа, аполитика, аҳәынҭқарра аргылара, иара убас алитература иеиуеиԥшым аспектқәа.
Алеқсеи Гогәуа 30 инареиҳаны ашәҟәқәа ҭижьхьеит, хә-томк рыла ишьақәгылоу иалкаау аҩымҭақәа реизга (2006 – 2007 шш.) уахь иналаҵаны. Урҭ рахьынтә аурыс аԥхьаҩцәа еицырдыруеит еиҭаганы Москва ақалақь аҿы иҭыжьыз абарҭ ашәҟәқәа: ажәабжьқәеи аповестқәеи реизга «Аӡиас ццакуеит амшын ахь» (Река спешит к морю») (1960ш.), «Аӡы агьама»(Вкус воды») (1974 ш.), «Асыс-мҟаа» («Время оленьего зова») (1981ш.), «Быжь-хаҳәк ианырхыс» («За семью камнями») (1984ш.), «Абжьынҵла»(«Дикая азалия»)(1989ш.), ажәабжьқәа реизга «Амацәыс агьама» («Вкус молний»)(ақ. Санкт-Петербург, 2020ш.), «Хаха-хымш ныҟәа ахьыбжьоу», «Елана», «Олимпиада», «Анана-Гәында лашҭа», «Ашәаџьҳәаҩ», «Ашьа цәгьа», «Быӷькаԥсан», «Амра амшын ианӡаало», «Анаҟә», «Кодор – Коракс» уҳәа, ароман-рапсодиа «Асду» («Большой снег»), Аҟәа 2008ш.), ароманқәа: «Аси амацәыси», «Аҽыкәаҳа», «Уаԥхьа игылоу деилургартә иҟалахьан», «Асҟак дааигәан, аха дузгәамҭеит», «Ашыцра», аповестқәа: «Ашәуа иеҵәа», «Шьха-ԥшӡа», «Мшәагә Дуи Мшәагә Хәыҷи», адрамақәа: «Амш-уаара», «Аҿықәан».
Ашәҟәыҩҩы ирҿиамҭақәа рнылон ажурналқәа: «Алашара», «Амцабз», «Дружба народов», «Студенческий меридиан», «Сельская молодежь», «Советская женщина», Урыстәыла иҭыҵуа егьырҭ аҭыжьымҭақәа маҷымкәа; агазеҭқәа: «Аԥсны ҟаԥшь», «Советская Абхазия», «Литературная газета» (ақ.Москва), «Еҵәаџьаа», «Республика Абхазия»; алитературатә еизгақәа «Ерцахә», «Кавкасиони», «Южный Кавказ» уҳәа егьырҭгьы.
А. Гогәуа аиҭагагь инапы алакуп, аԥсшәахь еиҭеигеит Ф. М. Достоевски («Ацәгьоуреи ахьырхәреи», «Аҵх шкәакәақәа»), А. П. Платонов, К. А. Федин («Аԥсуа жәабжьқәа»), Карло Коллоди «Иаиааиз ареволиуциа диктатурахоит»:
