Ашәҟәыҩҩцәа рыҿиаратә ҭынха аизгареи аиқәырхареи  ашәҟәыҩҩцәа Реидгыла афотоархив аԥҵара азҵаарақәеи рзы акомиссиақәа русура арӷәӷәара азы аӡбамҭа рыдыркылеит.

Аҳасабырбақәа ҟаҵо аилатәара аҿы иара убас иқәгылеит ажурнал «Алашара»  аредактор Хада Анатоли Лагәлааи ахәыҷтәы журнал «Амцабз» аредактор Хада Гәында Саканиаԥҳаи.  

Аџьынџьтәылатәи еибашьра Дуӡӡа аҿы Аиааира агара Амшныҳәа 80-шықәса ахыҵра азгәаҭара инамаданы Аԥсны ашәҟәыҩҩцәа Реидгыла аҿы аибашьратә тематика ала аԥсуа поетцәа ражәеинраалақәа реизга аҭыжьразы еиқәыршәахоит.  

Урыстәылатәи рколлегацәа аус рыцура аҳәаақәа ирҭагӡаны сынтәа аҭыжьра аплан иалагалоуп иара убас аԥсуа бызшәахьы еиҭагоу ҳаамҭазтәи урыстәылатәи апоетцәа ражәеинраалақәа реизга.

Уаанӡа аиԥш-зеиԥшу апроект ала ашәҟәыҩратә еидгыларақәа Жәларбжьаратәи Реилазаарала Москва ақалақь аҿы иҭыжьын аурыс бызшәахьы еиҭагаз аԥснытәи апоетцәа ражәеинраалақәа реизга «Аҟәатәи абааш» («Сухумская крепость»).

Аԥсуа сахьаркыратә литература ашьаҭаркҩы Дырмит Гәлиа диижьҭеит 150-шықәса аҵра инамаданы аиубилеитә усмҩаԥгатәқәа аҳәаақәа ирҭагӡаны, 2024 шықәсазы Аԥсны ашәҟәыҩҩцәа Реидгыла Гәылрыԥшь араион Ахадарахь Бабышьра ақыҭан 2-тәи Уарчатәи амҩа Аԥсны Жәлар рпоет Л.И.Гәли ихьӡ ахҵазарц азы аҳәара дәықәнаҵеит. Ашәҟәыҩҩцәа иҟарҵаз аҳәара инақәыршәаны, жәабранмза 14, 2025 шықәса рзы Гәылрыԥшь араионтә Еизара аҿы амҩа ахьӡ аԥсахра азы аӡбамҭа рыдыркылеит. Аԥсуа шәҟәыҩҩцәа ас еиԥш аӡбамҭа адкылара ииашоуп ҳәа ирыԥхьаӡоит, избан акәзар абри ақыҭан ауп дахьиз аԥсуа литература ауасхыр азышьҭазҵаз Дырмит Иасыф-иԥа Гәлиа.

Ашәҟәыҩҩцәа Реидгыла хәажәкырамза 21 азы апоезиа Адунеизегьтәи Амш азгәаҭара аҽазыҟанаҵоит, иара убас Аԥсны алитератор ҿарацәа Аҩбатәи рсеминар амҩаԥгара аҽазыҟаҵарақәа мҩаԥысуеит.

Уаанӡа еиԥш уажәгьы Аԥсны алитературатә ԥсҭазаара – аиубилеиқәа, алитературатә еиԥыларақәа, апоезиа ахәылԥазқәа, астол гьежьқәа, ҿыц иҭыҵыз ашәҟәқәа рӡыргара, асеминарқәа, уҳәа  хыԥхьаӡара рацәала аинтерес зцу ахҭысқәа рыла игәылҭәаахоит.