Владислав Арӡынба ҳаҭырла дыргәаладыршәарц, Аҟәа араион Алада Ешыра ақыҭан, уи анышә дахьамадоу иҟоу Амемориал амҵан ашәҭ шьыҵәрақәа рышьҭаҵара ацеремониа мҩаԥысит. Владислав Арӡынба ҳаҭырла дыргәаладыршәарц арахь имҩахыҵит Аҳәынҭқарра Ахада инапынҵақәа назыгӡо Бадра Гәынба, Аҳәынҭқарра Ахада Ихаҭыԥуаҩ инапынҵақәа назыгӡо Беслан Бигәаа, аԥыза-министр инапынҵақәа назыгӡо Владимир Делба, атәыла Анапхгара алахәылацәа, Жәлар Реизара-Апарламент Аиҳабы Лаша Ашәба, Апарламент адепутатцәа, Арбџьармчқәа рыруаа, аибашьра аветеранцәа, Аԥсны аполитикатәии ауаажәларратәии еиҿкаарақәа рхаҭарнакцәа.
«Владислав Арӡынба ихьӡ иузаҟәымҭхо иадҳәалоуп ҳаамҭазтәи аԥсуа ҳәынҭқарра аԥҵара. Иара ихьӡ хьтәы нбанла ҳҳәынҭқарра аҭоурых адаҟьақәа ирнылеит. Иара зегьы раԥхьаӡа иргыланы иԥсадгьыли иуаажәлари рахь имаз ҳәаа змамыз абзиабара ала далукаауан», – ҳәа ажурналистцәа дрыҿцәажәо иҳәеит Аԥсны Аҳәынҭқарра Ахада инапынҵақәа назыгӡо Бадра Гәынба.
