Аиқәшаҳаҭра абзоурала Урыстәыла атәылауаҩра змоу ахәыҷқәа хымԥада Аԥсны иахәҭоу амедицинатә цхыраареи аҟазауаа рҟынтәи ахылаԥшреи роулоит. Аиқәшаҳаҭра иазԥхьагәанаҭоит зеиԥш маҷу ачымазарақәа рыхәшәтәраҿы аҟазауаа рыцхыраара аусхк аҟны инарҭбааны аимадара, адыррақәа реимдара, абжьгарақәа рыҟаҵара.

«Ари ахәыҷқәа зегь мҽхкы ҭбаала адгылара шроуа азы агәрагара узҭо аиҩызара ду иалагамҭоуп», — ҳәа иҳәеит Алеқсандр Ткаченко.

Акультура-гәыҳалалратә фонд «Ашана  аԥҵаҩы Беслан Шьакаиа Урыстәылеи Аԥсни реизыҟазаашьақәа аусеицура аганахьала акыр зҵазкуа аетап аҿы иҟоуп, иахьа анапы зҵарҩыз Аиқәшаҳаҭра ачымазара ӷәӷәа змоу ахәыҷқәа рыцхраара ахырхарҭала аган ҿыцқәа рацәаны иаанартуеит ҳәа инаҵшьны иазгәеиҭеит.

«Аԥснытәи афонд «Ашана», Урыстәыла Ахада ифонд «Круг добра» ирыбжьарҵаз аиқәшаҳаҭра иахьазы ҳара ҳзы хәы змам акоуп. Ари Аиқәшаҳаҭра ҳаимадарақәа рырҿиара мацара иазырхам, ахәыҷқәа уаҵәтәи рԥеиԥш азы аҩ-ганк иҳаду аҭакԥхықәра аанарԥшуеит», — ҳәа иҳәеит Беслан Шьакаиа.

Шьакаиа иҭабуп ҳәа реиҳәеит анапы зҵаҩыз Аиқәшаҳаҭра аиқәыршәара иалахәыз зегьы.

Афонд  «Круг добра» – ари аԥсҭазаара ашәарҭара иҭазыргыло ачымазаара бааԥсқәа, ачымазара лаҽқәа, лассы-лассы иуԥымло ачымазара ӷәӷәақәагьы уахь иналаҵаны  змоу ахәыҷқәа адгылареи ацхыраареи рыфҭара иазку урыстәылатәи аҳәынҭқарратә абиуџьетнҭыҵтәи афондқәа иреиуоуп.