Валери Бганба иар убас аҩныҵҟцатәи аусқәа Рминистрреи Аҳәынҭқарратә шәарҭадара Амаҵзуреи алхраԥхьатәи апериод азы Алхратә комиссиа Хада алхратә штабқәа рганахьала ақәыӷәӷәара иацәыхьчазарц азы адҵа риҭеит.
Жәабранмзазы имҩаԥысыз алхрақәа раан аус руан 900 –ҩык инарзынаԥшуа аҩныҵҟатәи аусқәа Рминистрра аусзуҩцәа. Хәажәкырамза 1 азы ауаажәларратә ҭышәынтәалара ахылаԥшра арҭалоит 1000-ҩык рҟынӡа амилициа аусзуҩцәа.
«Аилаҩынтрақәа алхрақәа рымҩаԥгара амш аҽны иҟаӡамызт. Ҳара хазы игоу аучасткақәа рҿы ахьчара арӷәӷәаразы моментқәак ҳасаб азаҳуит», – ҳәа иҳәеит Роберт Киут.
Москвеи Черкесски ақалақьқәа рҿы абжьыҭаразы алхратә ҭыԥқәа ахьаартхо убасҵәҟьа идәықәҵахоит атәыла аҩныҵҟтәи аусқәа русзуҩцәа.
Аҳәынҭқарра Ахада инапынҵақәа назыгӡо Аҳәынҭқарратә шәарҭдара Амаҵзура анапхгара ахь жәабранмза 27 инаркны жәажәкырамза 1 аҟынӡа Егри Ԥсоуи рыла иҟоу аҳәынҭқарратә ҳәаа иахысуа атәылауаа ргәаҭара арӷәӷәара азы адҵа ҟаиҵеит.
