«Ҳара иАкх ахь инаҳгеит аилагарақәа рсиа. Урҭ алхрақәа зегьы рҿы аҭыԥ роуеит, уажәы имҩаԥгаз алхрақәагьы рҿы урҭ аҭыԥ роуит. Иарбоу аилагарақәа рыла ҳара ҳажәалагалақәа ҟаҳҵеит. Иҭабуп ҳәа расҳәарц сҭахуп АКХ аколлектив ахшыҩзышьҭра ҳаҭаны иахьаҳзыӡырҩыз, ҳааԥхьара аҭак ахьарҭаз. Дара иазгәарҭеит тезисқәак дара рылшарақәа ишақәымшәо, избан акәзар дара АКХ Акомпитенциа иаҵанакӡом. Аха дара ркомпитенциа иаҵанакуа азҵаарақәа зегьы рыла дара акомпромисс аԥшаара, иқәҳаргыло ҳадҵақәа разхьаԥшреи рыӡбареи иазхиоуп ҳәа иазгәарҭеит».
Леонид Чамагуа иажәақәа рыла, АКХ Адгәыр Арӡынба иалхратә штаб иадгалаз ажәалагалақәа ҭырҵаауеит, ахҳәаагьы ҟанаҵоит.
«Ҳара ҳазыԥшуп зыдгалара мҩаԥаагаз азҵаарақәа рҟынтәи АКХ акомпитенциа иаҵанамкуа азҵаарақәа ртәы ҳарҳәарц. Уаҵәтәи амш иалагӡаны дара ихымԥадатәиу амеханизмқәа зегьы аус адуланы уи иашьашәалоу адҵақәа алхратә ҭыԥ хадақәеи алхратә ҭыԥқәа ркомиссиақәеи рахь анашьҭра иазхиахоит», – ҳәа иҳәеит иара.
