«Ҳара ақәгыларақәа раан ахәыҷқәа ҳҭахуп. Ҳара иҳамаӡам актиор қәыԥшцәа. Аамҭақәак раԥхьа атеатралтә ҟазара аҵаразы Урыстәылаҟа агәыԥ дықәҵан, аха урҭ рахьынтәи  аӡәык-ҩыџьак роуп атеатр аҿы аус зуа иахьа.  Ҳара аусура ҭакԥхықәрала иазнеиуа, зус бзиа избало, аҟыбаҩ злоу ауаа ҳрышьҭоуп», – ҳәа илҳәоит  Хьыбла Мықәба.

Атеатр аколлектив аҽарҭбаауеит. Ааигәа уи дахыԥхьаӡалахеит Михаил Ҵкәуа, иара ҩ-спектакльк ихы рылаирхәуа далагахьеит.   Иҿыцу аусзуҩцәа ыҟоуп иара убас агримҟаҵаратәии акостиумқәа рыӡахратә цехи рҿы. Атеатр аҿы аусура иалагеит акаҳуажәырҭа.

Иахьа ахшыҩзышьҭра ду аҭахоит атеатр аимиџь, атеатр асоциалтә ҳақәа рҿы аӡыргарагьы уахь иналаҵаны.

94-тәи атеатралтә сезон, Хьыбла Мықәба лажәақәа рыла, аспектакль ҿыцқәа аанарԥшуеит.

Жәабранмзазы Карло Гольдони ипиеса «Мирандолина» ала Алхас Шамба иқәиргылаз аспектакль аԥхьарбара мҩаԥгахоит.  Дырмит Гәлиа ироман «Камаҷыҷ» ала аспектакль аус адулара мҩаԥысуеит. Аспектакль арежиссиор-ақәыргылаҩыс дамоуп Мадина Аргәын. Егьырҭ аԥхьарбарақәагьы азԥхьагәаҭоуп. Атеатр аҿы 95-тәи аиубилеитә театралтә сезон алацәажәара иалагахьеит.