Иара Аԥсны аауааԥсыра аӡәырҩы ргәалашәараҿы даанхеит асахьаҭыхҩы инапы иҵыҵхьаз убла хызхуа асахьақәа рыла, уи иара хыԥхьаӡара рацәара иусумҭақәа азикит. Асахьаҭыхыҩ ихаҭа Гәдоуҭа араион Дәрыԥшь ақыҭан дышизгьы, иара иԥсҭазаареи иҟазареи рҿы Ареспублика Аԥсны аҳҭнықалақь иҷыдоу аҭыԥ ааннакылон.
Ацәыргақәҵатә зал Хада адиректор Ельвира Арсалиаԥҳа ишазгәалҭаз ала, иара ирҿиаратә ԥсҭазаара зегьы иалагӡаны еиҭакрада иаанханы иҟаз акы акәын - Леуарса аԥсҭазаара еиуиеԥшым аганқәа рҿы алыԥшаах абареи аилкаареи аԥҵареи илшон.
