«Аиааира Адәыӷба» адунеи аҿы раԥхьаӡатәи еиҭаҵуа авагонеиԥшьыра аҿы аиммерсиатә инсталиацианы иҟоуп. Авагонқәа зегьы адраматә хҭысқәеи аҭоурыхтә фактқәеи ауаатәыҩсатә лахьынҵақәеи еилаҵо  хазы-хазы аҭоурыхқәа аанарԥшуеит.

Аԥсныҟа аара азы ҷыдала еиқәыршәан алагарҭатә (анольтә) вагон. Араҟа ицәыргақәҵоуп Аԥсны иалҵыз Аџьынџьтәылатәи еибашьра Дуӡӡа афырхацәа рфырхаҵарақәа атәы зҳәо амультимедиатә експозициа. Аҭааҩцәа арҭ ауаа рҭоурых рдырыртә алшара роуеит. Урҭ дыруаӡәкуп Аҟәа ақалақь аҿы инхо, жәабранмза  10 рзы  100-шықәсатәи зиубилеи азгәасҭаз Алеқсеи Екуп-иԥа Лашәриа. «Аиааира Адәыӷба» жә-вагонк рыла ишьақәгылоуп.

Актәи авагон «Аҭынч аамҭа» аибашьра алагаанӡа аҭынч ԥсҭазаара аҵыхәтәантәи асааҭқәа ирызкуп.

Аҩбатәи авагон «Бресттәи абааш» аҭынч ԥсҭазаара асценақәа рҟынтәи ихьанҭоу аибашьра ареалтә хҭысқәа рахь аиасрала ахьамҵреи агәымшәареи  ирсимволны иҟоу Бресттәи абааш ахьчара аҭоурых аанарԥшуеит.

Ахԥатәи авагон «Афронт ахь адәыӷба» ахьӡуп. Уи усҟантәи амшқәа рзы иҟаз агәалаҟазаарақәеи ацәаныррақәеи рыиагарала зыԥсадгьыл ахьчара азы афронт ахь ицоз арԥарцәа ирыхцәажәоит.

Аԥшьбатәи авагон «Аконцлагерь». Ари авагон иаҳгәаланаршәоит анацисттә концентрациатә лагерьқәа рҿы иаарԥшхоз ампыҵахалыҩцәа ргыгшәыгра атәы. Аекспозициа ахықәкы хаданы иҟоуп аҭааҩцәа рыхшыҩзышьҭра анацистцәа рыцәгьоурақәа разырхара, усҟантәи аамҭа хлымӡаах агәалашәара аиқәырхара иаҵоу аҵакы ахадара, ҳаԥхьаҟа ас еиԥш иҟоу атрагедиақәа рыԥхьырҟәҟәаара азы  акцент ҳасабла еиҵагыло абиԥарақәа уи рыхдырраҿы анагара.  

Ахәбатәи авагон «Асанитартә вагон». Араҟа ицәыргақәҵоуп аибашьраҿы ахәра зауз аибашьцәа  рыԥсҭазаара аиқәырхаразы рыхәышәтәра, напы рыдкыланы ахылаԥшра рыҭара  — ауаа рыԥсҭазаара аиқәырхара иадҳәалоу аинсталиациақәа.

Афбатәи авагон «Адәыӷба аҽыкәабарҭа-аӡәӡәарҭа», иаанарԥшуеит афронт аибашьцәа рсанитартә нормақәа рықәныҟәара азы иҟаз аҽыкәабарҭа-аӡӡәарҭатә дәыӷбақәа рыбзазашьа.

Абыжьбатәи авагон «Аштабтә вагон»  аоперациа «Багратион» еиԥш иҟаз аидыслара дуқәа рымҩаԥгара апланқәа ахьышьақәдыргылоз аштаб иазкуп.  

Аабатәи авагон «Иапонтәи амилитаристцәа рыцәгьоура» атәы аҳәоит, иапонтәи амилитаристцәа, ахәҭакахьала, «Аотряд 731» ацәгьоурақәа, иара убас  Чен Бенхуа реиԥш иҟаз афырхацәа урҭ рҿагылара атәы  аанарԥшуеит.

Ажәбатәи авагон «Аиааира, аҩныҟа ахынҳәра» аибашьра анҵәара символра азуа, ааԥын, 1945 шықәса рзы аиааирагаҩцәа-афырхацәа рыҩныҟа рыхынҳәра амомент аанарԥшуеит.  

Ацәыргақәҵа аҭааҩцәа зегьы усҟантәи аепоха агәылахалара, агәалашәара амырӡра ҳажәлар рзы иаҵоу аҵакы аилкаара азы зеиӷьаҟам алшара аԥнаҵоит.