Аҟәа. Жәабранмза 17, 2025 шықәса. Аԥсныпресс. Апартиақәеи ауаажәларратә еиҿкаарақәеи Реидгыла Аҳәынҭқарра Ахада инапынҵақәа назыгӡо атәыла анапхгареи аоппозициеи рхаҭарнакцәа атәыла аҿы ишьақәгылаз ауаажәларра-политикатә кризис аҭышәынтәлара азы абҵарамза 19, 2024 шықәсазы ирыбжьарҵаз аиқәшаҳаҭра ӷәӷәала еилеигеит ҳәа аҳәамҭа ҟарҵеит.
«Иарбоу Аиқәшаҳаҭра аҭагылазаашьа аконституциа аҳәаақәа ирҭагӡаны аанкылареи ҽҳәараанӡатәи Аҳәынҭқарра Ахада иалхрақәа жәабранмза 15, 2025 шықәсазы рымҩаԥгаразы аӡбамҭа адкылареи алнаршеит. Аиқәшаҳаҭра апункт 5 инақәыршәаны, «иҟоу аминистрцәа рмаҵуратә уалԥшьа нарыгӡалоит ҿыц иалырхраны иҟоу Аҳәынҭқарра Ахада имаҵура дахагылаанӡа», – ҳәа иазгәаҭоуп Аидгылара иаланарҵәаз ааԥхьара аҿы.
Аха, жәабранмза 17, 2025 шықәса рзы, абжьыҭира аҩбатәи атур амҩаԥгареи аҳәынҭқарра Ахада ҿыц иалхреи дазымԥшӡакәа, Аҳәынҭқарра Ахада инапынҵақәа назыгӡо Валери Бганба Аҳәынҭқарратә шәарҭадара Амаҵзура ахантәаҩы иамхра азы Аусԥҟа инапы аҵаиҩит. Иҟоуп аинформациа егьырҭ акадртә усԥҟақәагьы шыҟало азы.
«Убас ала, хыхь иарбоу Аиқәшаҳаҭра абжьаҵарала Аҳәынҭқарра Ахадас иҟаҵаз Валери Бганбеи аоппозициа ахаҭарнакцәеи знапаҵаҩра мҩаԥгаз аиқәшаҳаҭра ӷәӷәала еиларгеит. Аиқәшаҳаҭра аилагара иахылҿиаар ҟало ахҟьаԥҟьақәа зегьы рзы аҭакԥхықәра Валери Бганбеи уи идгылаҩцәеи ирықәшәоит», - ҳәа иазгәаҭоуп аҳәамҭа аҿы.
