Аҟәа. Жәабранмза 17, 2025 шықәса. Аԥсныпресс. Аԥсны Аҳәынҭқарра адәныҟатәи аусқәа рминистрра Европатәи адәныҟатә еимадарақәа рзы Амаҵзура иҟанаҵаз аҳәамҭа иадҳәаланы иҟанаҵаз ахҳәаа:
Ҳара ҳхы азышьҭны азхьаԥшра аҳҭеит Европатәи адәныҟатә еимадарақәа рзы Амаҵзура апресс-маӡаныҟәгаҩ иҟаиҵаз аҳәамҭа, уа иаҳәоит: «Европатәи Аидгыла жәларбжьаратәи азин ала иазхаҵоу Қырҭтәыла аҵакыратә акзаареи асуверенитети ирыдгылоит. 2025 шықәса жәабранмза 15 азы иоккупациа зызуу Аԥсны арегион ҳәа изышьҭоу аҿы имҩаԥысыз Аҳәынҭқарра ахада иалхрақәа ирызкны иаҳгәалаҳаршәоит Европатәи Аидгыла урҭ зламҩаԥысыз аконституциатәи азинтәи ҳәаақәа ирықәшаҳаҭым. Европатәи Аидгыла азхамҵаратәи аинтеграциатәи политика амҩаԥгара иацнаҵоит».
Убри инамаданы, Аԥсны Аҳәынҭқарра адәныҟатәи аусқәа Рминистрра аҳәамҭа ҟанаҵоит:
Иҟаҵоу аҳәамҭа Бриуссель имҩаԥнаго акониунктуратә политика иақәшәоит, иҟоу аиашахаҭара азхаҵара аҭахым, иҟаҵәҟьоу аиаша иадҳәалам ашаблонқәа ахы ианархәоит.
Румыниа аҳәынҭқарра ахада иалхрақәа рзы иҟаз аҭагылазаашьа аконтекст инадҳәаланы ицәырҵуеит азҵаара: шаҟа ҳақәгәыӷыр ауазеи европатәи “адемократиа”?
Ҳара инаҵшьны иазгәаҳҭоит, ас еиԥш иҟоу аҳәамҭақәа ҳҳәынҭқарраҿы имҩаԥысуа аполитикатә процессқәа зынӡаскгьы анырра шрырымҭо, урҭ Аԥсны Аҳәынҭқарра аҩныҵҟатәи аусқәа рҽалагалара аҽазышәара мацара ракәны ишыҟоу.
