Апроект «Абхазия: мозаика» ҩ-хәҭак рыла ишьақәгылоуп. Актәи ахәҭа – аҵарадырратә ҟәша ауп, уи аҳәаақәа ирҭагӡаны аԥсуа мозаика ахатә ҷыдареи аҭоурыхи рзы алекциақәеи аконференциақәеи азԥхьагәанаҭоит. Иара убас Аԥсны амазаикатә обиектқәа рыхсаалақәеи рсиеи аиқәыршәара, урҭ анаҩс ахьчара иаҵанакуа акультуратә обиектқәа реестр алагалара азы рыклассификациа амҩаԥгара азы агәҭакқәа ыҟоуп. Ари апроект ахәҭа ауаажәларратә ҿиаразы аԥсуа фонд «Амшра» адгыларала имҩаԥысуеит.
Еиду Амилаҭқәа Реиҿкаара Аҿиара Апрограммеи Европатәи Аидгылеи (ПРООН, ЕС) рыдгыларала, EU4Dialogue аԥшьгара аҳәаақәа ирҭагӡаны имҩаԥысуа апроект аҩбатәи ахәҭа аҿы «Ипподром» ҳәа еицырдыруа, Гагра араион Бзыԥ ақыҭан иҟоу автобусқәа раангыларҭа ареставрациа азԥхьагәаҭоуп.
