Уи иажәақәа рыла, алхрақәа иаартны, изакәанны имҩаԥысит.

Али Захдуд Алхратә комиссиа Хада алхратә ҭыԥқәа рҿы ицәырҵуаз аимак-аиҿакқәеи мыцхәы идуумыз аилагарақәеи рҭышәынтәалареи рырҽеиреи рганахьала имҩаԥнагаз аусура азгәеиҭеит.  Ҿырԥштәыс уи абри ахҭыс ааигеит:

«Абыжьқәа рыԥхьаӡара ашьҭахь сара апкаанҵа аҟынӡа анаӡара  аганахьала маҷк исԥырхагахо иалагеит. Ҳара азин ҳарымҭаӡеит апкаанҵа афотосахьа аҟаҵара. Аха, ҳара Алхратә комиссиа Хада ахь ҳанадҵаала ашьҭахь, иаразнак уахьынтәи алхратә ҭыԥ ахь иасны ҳус дырманшәалеит», – ҳәа иазгәеиҭеит Али Захдуд.

Иара инаҵшьын иазгәеиҭеит, жәларбжьаратәи анаԥшыҩ иаҳасабала гәахәарыла алхрақәа аҩбатәи атур ихы шалаирхәуа. Али Захдуд Аԥсны ажәлар ԥхьаҟатәи рԥеиԥш ачаԥара аҿы ақә-ҿиарақәеи адемократиатә принципқәа рықәныҟәареи рзеиӷьаишьеит.

Боливиа Милаҭрацәалатәи азакәанԥҵаратә Сенат алахәыла Лаура Мигелина Паррага Леон де Чаука абжьыҭира алҵшәақәа ирныԥшырц зылшоз изеиԥшразаалак аилагарақәа лымбаӡеит ҳәа иазгәалҭеит. «Иацынтәарак ҳара алхратә ҭыԥқәа ҳарҭаауан. Амш иалагӡаны ҳара џьаргьы алхрақәа рылҵшәақәа ӷәӷәала ианыԥшыр зыошо аилагарақәа, мамзаргьы алхыҩцәа рҟынтәи даҽа гәынамӡарақәак аҭыԥ рыманы ҳәа акгьы ҳамбаӡеит. Иацы ҳара амш ҳхаркәшеит абжьқәа рыԥхьаӡара анаԥшрала, ҳара ҳахьыҟаз алхратә ҭыԥ аҿы абжьқәа зегьы еиқәшәеит.

Сара иҭабуп ҳәа расҳәарц сҭахуп Алхратә комиссиа Хада иарбоу алхратә процесс анаԥшыҩ иаҳасабала алахәхаразы исоуз алшара азы. Иааизакны, жәларбжьаратәи анаԥшра – ари даараӡа акыр зҵазкуа процессуп, ҳара ҳгәаанагарала, ари аинститут аринахысгьы аҿиара аиуроуп», –  ҳәа илҳәеит лара.

Алхрақәа реиҿкаареи рымҩаԥгареи рыҩаӡара ахәшьара ҳаракы арҭеит иара убас жәларбжьаратәи анаԥшыҩцәа Вито Гриттани (Италиа),  Петрос Волдегиоргис Волдесенбет (Ефиопиа),  Горан Шимпрага (Сербиа),  Горан Димов (Аҩадатәи Македониа),  Моҳаммад Саиед Бахмани (Иран).