Иара Аԥсны алхратә ҭыԥхадақәа 35 рҟны алхырҭатә ҭыԥқәа 152 шеиҿкаау азы адарра ҟаиҵеит. Убас:

– Аҟәа ақалақь аҿы – алхратә ҭыԥхадақәа 9, алхырҭатә ҭыԥқәа 25;

– Гагра араион аҿы – алхратә ҭыԥхадақәа 5, алхырҭатә ҭыԥқәа 29; 

– Гәдоуҭа араион аҿы– алхратә ҭыԥхадақәа 7, алхырҭатә ҭыԥқәа 31;

– Аҟәа араион аҿы – алхратә ҭыԥхадақәа 2, алхырҭатә ҭыԥқәа 8;

– Гәылрыԥшь араион аҿы – алхратә ҭыԥхадақәа 3, алхырҭатә ҭыԥқәа 16;

– Очамчыра араион аҿы  – алхратә ҭыԥхадақәа 6, алхырҭатә ҭыԥқәа 33;

– Ҭҟәарчал араион аҿы– алхратә ҭыԥхадақәа 2, алхырҭатә ҭыԥқәа 8;

– Гал араион аҿы  – алхратә ҭыԥхадақәа 1, алхырҭатә ҭыԥқәа 2.

Алхырҭатә ҭыԥқәа Аԥсны анаҩсгьы ақалақьқәа Москвеи Черқесски иаартуп.

«Иазгәасҭар сҭахын, иарбоу алхырҭатә ҭыԥқәа ҩба Урыстәылатәи Афедерациа аҵакыраҿы Урыстәыла Ареспублика Аԥсны асуверенитети ахьыԥшымреи аназханаҵа  ашьҭахь  ишаартыз», - ҳәа иҳәеит Алхратә комиссиа Хада ахантәаҩы.

Ихадоу алхыҩцәа рсиа иалагалоуп 134 нызқьи 500 ҩык.

Дмитри Маршьан Аԥсныҟа 25 тәыла рҟынтәи 100-ҩык инарзынаԥшуа жәларбжьаратәи анаԥшыҩцәа ааит ҳәа адырра ҟаиҵеит.

«Аԥсныҟа иаҳзааит Австриа, Аргентина, Бангладеш, Боливиа, Гватемала, Германиа, Бырзетәыла, Доминикантәи Ареспублика, Иран, Испаниа, Италиа, Колумбиа, Кыргызтәи Ареспублика, Мексика, Приднестровтәи Молдавтәи Ареспублика, Ареспублики Кореиа, Ааахыҵ-Уаԥстәылатәи Ареспублика, Урыстәылатәи Афедерациа, Румыниа, Аҩадатәи Македониа, Сербиа, Танзаниа, Тунис, Узбекьысҭан, Франциа, Чили, Ефиопиа, уҳәа атәылақәа рҟынтхи жәларбжьаратәи анаԥшыҩцәа. Урҭ рахьынтә аӡәырҩы жәларбжьаратәи анаԥшыҩцәа раҳасабала уажәаԥхьагьы Аԥсны иаҭаахьан», - ҳәа иҳәеит Дмитри Маршьан.

Жәабранмза 15 рзы апресс-центр аус аулоит ашьыжь асааҭ 08:00 инаркны асааҭ 22:00 рҟынӡа. Амш аҩныҵҟа Алхратә комиссиа Хада алхратә процесс амҩаԥысшьеи ауаа рааиреи  рзы аинформациа аланарҵәалоит.

Абжьыҭара заатәи алҵшәақәа ртәы еилкаахоит жәабран 16, асааҭ 12:00 рзы.