Аҟәа. Жәабранмза 14, 2025 шықәса. Аԥсныпресс. Жәабранмза 14 рзы Аҟәа ақалақь аҿы иаартыз Алхратә комиссиа Хада апресс-центр аҿы иқәгылеит жәларбжьаратәи анаԥшыҩцәа. Урҭ Аԥсны Аҳәынҭқарра Ахада иалхрақәа рымҩаԥгара аиҿкаара аҩаӡара ахәшьара ҳаракы арҭеит.
Франциантәи иааз анаԥшыҩ, жәларбжьаратәи азин аганахьала азиндырҩы, Урыстәылатәи Афедерациа иҿыцу арегионқәа руааԥсыра рзинқәа рыхьчара знапы алаку, аполитикатә консультант, ажурналист Арно Оливие Жан Девеле иара Аԥсны аҟазаара даара деигәырӷьоит ҳәа иазгәеиҭеит.
«Сара зегьы ҭышәынтәаланы ишымҩаԥысуа, ҳара адемократиатә алххрақәа рымҩаԥысра шаабо агәра ганы сыҟоуп», - ҳәа иҳәеит иара.
Италиантәи анаԥшыҩ, апартиа «Движение пяти звезд» аҟынтәи Апарламент адепутат Сара Куниал алхратә процесс аиҿкаара аҩаӡара ҳаракуп ҳәа иазгәалҭеит. «Шәара шәтәылаҿы имҩаԥысуа адемократиатә процессқәа егьырҭ атәылақәа рзы ажәлар рыҽҳәаақәҵара аганахьала ҿырԥшыгас иҟалар алшоит. Аԥсни Итаалиеи аҭоурыхи акультуреи рнаҩс еидызкыло рацәоуп. Ҳара еилаҳкаауеит шәара ихьыԥшым, зхы иақәиҭу тәыланы аҟазааразы шәгәазыҳәара. Убри аганахьала сара ибоит шәара шәыжәларгьы убасҵәҟьа ишыҟоу», - ҳәа илҳәеит лара.
Колумбиа аҟынтәи анаԥшыҩ, Аконгресс Ахаҭарнакцәа Рпалата алахәыла Давид Алехандро Торо Рамирес Аԥсны аҭааразы иоуз ааԥхьара гәахәара дула идикылеит ҳәа иазгәеиҭеит.
«Сара гәахәара дула ари асадкылара зныԥшуа атәыла ссир саҭаауеит. Ҳара ҳхықәкы хаданы иҟоу – аелекторалтә процессқәа зегьы анаԥшра аҭара», – ҳәа иҳәеит иара.
Ареспублика Кореиа аҟынтәи анаԥшыҩ, апрофессор, ауаажәларратә усзуҩ Иун Иунг Сик иара уажәаԥхьа Аԥсныҟа дмааӡацызт, иибаз аҟынтәи даара анырра бзиа иоуит ҳәа иазгәеиҭеит.
Аԥсны Аҳәынҭқарра Ахада иалхрақәа жәларбжьаратәи анаԥшыҩ иаҳасабала зхы алазырхәа Урыстәылатәи Афедерациа Аҳәынҭқарратә Дума Афедералтә Еизара I, II , IV ааԥхьарақәа рдепутат, азиндырратә наукақәа рдоктор Сергеи Бабурин апресс-центр аартра иадҳәалаз аусмҩаԥгатә аҿы иҳәеит:
«Сара гәыкала исҭахуп шәареи ҳареи уаҵәы агәра ҳгарц Аԥснытәи аҳәынҭқарра шьақәгылеижьҭеи акыр шааҵуа. Араҟа еиуеиԥшым алхратә кампаниақәа ҳаҭыреиқәҵарала, иҭышәынтәаланы, еиҿкааны рымҩаԥгара аԥышәа ыҟоуп. Аҳәынҭқаррахь акандидатқәа рыбжьара егьа аибарххара ыҟазаргьы, шәааи агәра ҳгап уи зегьы атәыла Аконституциеи азакәани аҳәаақәа ирҭагӡаны ишыҟало, шәареи ҳареи ҳакәзар, имҩаԥысраны иҟоу алхрақәа ахылаԥшра аҳҭалоит, агәарагьы ҳгоит ҳара уи иахәҭоу ахәшьара аҭара шҳалшо. Сара алхрақәа раан аума, егьырҭ аполитикатә процессқәа раан аума, Аԥсныҟа саауа салагеижьҭеи абар шьҭа 30 шықәса иреиҳауп Сара гәык-ԥсыкала исҭахуп Аԥсны Аҳәынҭқарреи Урыстәылатәи Афедерациеи изеиԥшразаалак џьара еилибамкаара ҳәа ак рыбжьамларц, ҳаимабзиаратә еизыҟазаашьақәа ессаира хра злоу аҿиара амазарц».
