Аԥсны Жәлар Реизара-Апарламент Аиҳабы алхрақәа ҭышәынтәаланы, азакәан инақәыршәаны  ишымҩаԥгахо азы агәыӷра шимоу иҳәеит.

«Алхрақәа рымш – Аԥсны ажәлар рзы даараӡа акырзҵазуа амш ауп», – ҳәа иҳәеит иара.

Аахыҵуаԥсытәылатәи аделегациа ахада Заза Дриаев аԥсуа ган ирырҭаз ааԥхьара азы иҭабуп ҳәа иҳәеит.

«Сара агәра ганы сыҟоуп, аԥсуа жәлар Аԥсны аизҳазыӷьара азы ииашоу амҩа алырхуеит. Сара исҭахуп араҟа аҭынчреи аҭышәынтәалареи аҳра руа иҟаларц. Ҳара иаадыруеит алхрақәа ртәы. Ҳаргьы акыр аибарххара зцу алхрақәа мҩаԥаагоит. Аха аҵыхәтәан аконсенсус ҳаԥшауеит, ҳаилибакаауеит. Сара сақәгәыӷуеит шәара шәалхрақәагьы иҭышәынтәәаланы, азакәани Аконституциеи ишаҳәо ала  ишымҩаԥысуа», – ҳәа иҳәеит иара.

Апарламент иаҭаанӡа аахыҵуаԥстәылатәи аделегациа Аԥсны жәлар Рџьынџьтәылатәи еибашьра аҿы иҭахаз ҳаҭырла иргәаладыршәеит, Аҟәа ақалақь, Ахьӡ-Аԥша апарк аҿы иҟоу Амемориал амҵан ашәҭ шьыҵәрақәа шьҭарҵеит.

Аахыҵ Уаԥстәылатәи Ареспублика Апарламент адепутатцәа Аԥсны Жәлар Реизара-Апарламент Аиҳабы Лаша Ашәба иҟаиҵаз ааԥхьарала Аԥсны Аҳәынҭқарра Ахада иалхрақәа анаԥшыҩцәа раҳасабала рхы аладырхәуеит.  

Аделегациа Аҟәа ақалақь аҿы иҟоу алхратә ҭыԥқәа зегьы рахь анеира, иара убас алхрақәа рымҩаԥысшьа агәаҭара азы Аԥсны араионқәа рҭаара азԥхьагәаҭаны ирымоуп.