«Афымцамч азы азакәани «Ареспублика Аԥсны астратегиатә обиектқәа рзы» азакәани дрықәныҟәаны, Аҳәынҭқарра Ахада инапынҵақәа назыгӡо Валери Бганба абарҭ анапынҵақәа ҟаиҵеит:  Афымцамчи атранспорти Рминистрра ҷыдарыла аҳәынҭқарратә мазараны иԥхьаӡоу аенергетика  аобиектқәа  ахатә мазарахь аиагара  алзмыршо аенергетика аусхкы иадҳәалоу азакәанԥҵара анормақәа рынагӡара иазырхоу ауснагӡатәқәа рымҩаԥгара алыршазароуп. Урҭ рхыԥхьаӡараҿы иҟоуп:

1) Аминистрра анапаҵаҟа иҟоу Ареспубликатә унитартә Наплакы «Амшынеиқәафымцамч аҟынтәи аҭҵаареи анаҩс апрокуратура Хада ахь адәықәҵареи рзы арбитражтә ӡбамҭа №АС-50/2024 аматериалқәа аиура аиҿкаара;

2) Ареспубликатә унитартә Наплакы «Амшынеиқәафымцамч» анапхгаҩи аиџьныр хадеи рҟынтәи аус №АС-50/2024 ала аӡбаратә усеилыргара аҳәаақәа ирҭагӡаны зыдгалара мҩаԥгаз азыҳәаҩ – ЗҲА ЕА «Аҟәатәи Аӡфымцатә Станциа» (ООО СП «Сухум-ГЭС») Аҟәа араион аҿы Аҟәатәи Аӡфымцатә Станциа аҟынтәи астанцеиҵа «Аҟәа – 1» («Сухум-1») аҟынӡа зхаҳәатәала иргылаз, 19,6 км. иҟоу, зымчхара 110 кВт рҟынӡа инаӡо афымцамҩангага ацәаҳәа ахатәра азхаҵара азы иаланаҵаз азыҳәара адгылара азы апозициа аҵаҵӷәыркызаареи азакәанреи рганахьала шәҟәыла еиқәыршәоу аилыркаага аиуразы адҵа ақәыргылареи анаҩс уи азы азинтә шьаҭа ыҟазар, адисциплинартә, ахьырхәратә уснагӡатәқәа рымҩаԥгареи;

3)Азинтә шьаҭақәа рыҟазаара ашьақәыргалараан, Ареспублика Аԥсны Арбитражтә аусмҩаԥгаратә Закәанеидкыла ахәҭаҷ 33 инақәыршәаны,  аус №АС-50/2024 ала Арбитражтә ӡбарҭа ԥхынҷкәынмза 06, 2024 шықәсазы иаднакылаз, азакәанмчы зауз азыӡба  иҿыцу, мамзаргьы ҿыц ицәырҵыз аҭагылазаашьақәа рыла аиҭахәаԥшразы аусеиҿкаара аԥшьгара;

4) Арбитражтә ӡбарҭа азыӡба ахкьыԥхь адырраҭара ахықәкы анагӡара азы Жәлар Реизара-Апарламент ахь адәықәара;

Аҟәа араион Ахадара иарбоу Азԥхьанҵа апункт 1 иарбоу аҭагылазаашьақәа рышьақәыргылара мҩаԥысаанӡа, Аҟәа араион аҿы Аҟәатәи Аӡфымцатә Станциа аҟынтәи астанцеиҵа «Аҟәа – 1» («Сухум-1») аҟынӡа зхаҳәатәала иргылаз, 19,6 км. иҟоу, зымчхара 110 кВт рҟынӡа инаӡо афымцамҩангага ацәаҳәа ахатәра азин азхаҵаразы ашәҟәҭагалара амҩаԥгареи ахатәразы аршаҳаҭга аҭареи рзы азин амхзароуп.

Валери Бганба иара убас Аконтрольтә Палата ахантәаҩы Каха Пертаиа иахь Ареспубликатә унитартә Наплакы «Амшынеиқәафымцамч» аганахьала аплан ахыхьтәи агәаҭаратә усмҩаԥгатәқәа рымҩаԥгаразы аҳәара зну ашәҟәы дәықәиҵеит.