Аҟәа. Жәабранмза 11, 2025 шықәса. Аԥсныпресс. Зыхьӡ нагоу аспортсменцәа Михаил Чачба ихьӡ зху гәдоуҭатәи ахәыҷтәы-қәыԥштә спорттә школ ааӡамҭацәа, ақәԥаҩ ҿарацәа рзы амастер-класс мҩаԥыргеит. Гәдоуҭаҟа иааит Урыстәыла зҽаԥсазтәыз аспорт азҟаза, Европа хынтә ачемпион, адунеи хәынтә ачемпион, аолимпиатә чемпион, зхы иақәиҭу аиқәԥара азы Урыстәыла еизгоу акоманда азыҟаҵаҩ хада Хаджимурат Гацалов, абырзен-аурымтә қәԥара азы Урыстәыла аспорт азҟаза, Европа ачемпион, аолимпиатә чемпион, Ҟабарда-Балкариатәи Ареспублика Апарламент аспорт азы акомитет ахантәаҩы Мурат Карданов, абырзен-аурымтә қәԥара азы Урыстәыла аспорт азҟаза, Европа хынтә ачемпион, аолимпиатә чемпион Асланбек Хуштов.
Асасцәа дрыцны амастер-класс мҩаԥигон Аолимпиатә хәмаррақәа рҿы аџьазтә аԥхьахә згааз, адунеи хынтә ачемпион, Европа хынтә ачемпион Денис Царгәыш.
Иналукааша, еицырдыруа аспортсменцәа ақәԥаратә ԥышәеи ари аспорттә хкы иамоу амаӡақәеи рзеиҭарҳәеит аспортсмен ҿарацәа. Ақәԥаҩцәа ҿарацәа аинтерес кны ачемпионцәа ирыцклаԥшуан, акы рылаԥш иҵамшәакәа иаанхар ҳәа ишәаны.
