Адиспансеризациа ианаамҭоу ачымазара аԥшаареи, мамзаргьы урҭ рыԥхьырҟәҟәаареи алнаршоит. Уи еиҵагыло абиԥара рзы акырӡа аанагоит, ҳәа иԥхьаӡоит  Едуард Быҭәба.

Уи иажәақәа рыла, амш иалагӡаны 80-ҩык ашколхәыҷқәа рмедицинатә гәаҭара амҩаԥгара азԥхьагәаҭоуп.  Аҳақьымцәа аҵаҩцәа ргәабзиара азеиԥш ҭагылазаашьа ахәшьара арҭоит. Апроблемақәа зманы иаарԥшхо ахәыҷқәа амедицинатә ҭҵаара амҩаԥгара рабжьгахоит.

«Иааиуа амчыбжь азы иаараны иҟоуп даҽа бригадакгьы, урҭ 10-ҩык аспециалистцәа рыла еибыҭоуп, дара Аԥсны еиуеиԥшым араионқәа рҿы аус рулоит. Ареспублика иқәынхо ахәыҷқәа зегьы ргәаҭара азы хәба-быжьба амедицинатә бригадақәа радыԥхьалара азԥхьагәаҭоуп», -ҳәа иҳәеит иара.

Едуард Быҭәба иазгәеиҭеит ҳаԥхьаҟа арахь иаалар шыҟало еицырдыруа аҵарауаа, академикцәа, апрофессорцәа.

Апроект лаҵарамза нҵәаанӡа аус ауеит, Аԥсны ахи-аҵыхәеи 30 нызқьҩык ашколхәыҷқәа ирыхәаԥшуеит. Агәаҭарақәа хатәгәаԥхарала имҩаԥысуеит Аԥсны ашколқәа 150 рҟны, еиҳа инахароу Очамчыра, Гал, Тҟәарчал араионқәа рҟынгьы.

.

Агәабзиарахьчара аминистр иара убас ҳаԥхьаҟа амедицинатә хсаалақәа ацифркра ҟалоит, уи аинформациа зегьы апрофильтә клиникақәа рахь идәақәҵахоит ҳәа адырра ҟаиҵеит.

Аԥсны аҵареи абызшәатә политикеи  рминистр инапынҵақәа назыгӡо Инал Габлиа урыстәылатәи ззанааҭдыра ҳараку аҳақьымцәа раара, урҭ ҳреспублика аҿы ижәытәӡоу, Нестор Лакоба ихьӡ зху 10-тәи ашьхарыуаа рышкол иахьаҭааз гәырӷәҿьара дууп ҳәа иазгәеиҭеит.

Ахәыҷқәа рхирург Екатерина Алексеева еиҭалҳәеит уажәы ахәыҷқәа рдиспансеризациа аҳәаақәа ирҭагӡаны абарҭ аспециалистцәа аус руеит ҳәа: ахәыҷтәы  уролог-андролог, ахәыҷтәы хирург, аневролог, аотоларинголог, аофтальмолог, апсихиатр, аендокринолог, апедиатр, аультрабжьытә диагностика аспециалист, акардиологцәа. «Еиуеиԥшым ахырхарҭақәа рыла аҳақьымцәа ааны згәабзиара уашәшәыроу ахәыҷқәа алԥшааны наҟ-наҟ цхыраарас ирыҭатәу рыӡбоит», - ҳәа илҳәеит лара .

Адиспансеризациа аҭаацәа рақәшаҳаҭрала имҩаԥыргоит, ироуа адыррақәа зегьы ацифрахь ииагахоит, аҭыԥантәи аполиклиникақәа ирыҭахоит, анаҩс уа апациентцәа хәыҷқәа ргәабзиара иацклаԥшларц азы.

Аинвазиа маҷ абӷашшара ахирургиа Ацентр анапхгаҩы, атравматолог-ортопед Борис Сычеников, иарбоу амедицинатә усмҩаԥгатәқәа хатәгәаԥхаралатәуп, урҭ ахәҭакахьала изхымԥадатәиу Аԥсны агәабзиарахьчара азы афинанстә ныхтәқәа рызԥхьагәаҭара азы ауп ҳәа иазгәеиҭеит.  

Аофициалтә хәҭа ашьҭахь атәыла аҵарадырреи агәабзиарахьчареи рминистрцәа рнапынҵақәа назыгӡо ашкол арҵаҩцәеи аҵаҩцәеи ирыҿцәажәеит.