Аҟәа. Жәабранмза 12, 2025 шықәса. Аԥсныпресс. Аҳәынҭқарра Ахада инапынҵақәа назыгӡо Валери Бганбеи атәыла аԥыза-министр актәи ихаҭыԥуаҩ, афымцамчи атранспорти рминистр инапынҵақәа назыгӡо Џьансыхә Нанбеи Арбитражтә ӡбарҭа Аҟәа араион аҿы Аҟәатәи Аӡфымцатә Станциа аҟынтәи астанцеиҵа «Аҟәа – 1» («Сухум-1») аҟынӡа зхаҳәатәала иргылаз, 19,6 км. рҟынӡа инаӡо, зымчхара 110 кВт рҟынӡа инаӡо афымцамҩангага ацәаҳәа аҳәынҭқарратә мазараны азхаҵара азы иаднакылаз аӡбамҭа иадҳәалоу аҭагылазаашьа иалацәажәеит. Валери Бганба иазгәеиҭеит иара Аԥсны афымцамчи атранспорти Рминистрра ала Ареспубликатә Унитартә Наплакы «Амшынеиқәафымцамч» шьаҭанкылатәи аинвентаризациа амҩаԥгаразы Ақәҵара инапы шаҵаиҩыз.
«Хымԥада еилкааны ишьақәыргылатәуп «Амшынеиқәафымцамч» абаланс аҿы иҟоу зегьы, уи астатус зеиԥшроу. Рыцҳарас иҟалаз, ҳара иахьа иаабоит иарбоу аусбарҭа апозициақәак ацәыӡра ишаҿу. Араҟа зыӡбахә ҳамоу атәыла аенергетикатә шәарҭадара ауп. Ареспубликатә Унитартә Наплакы «Амшынеиқәафымцамч» аҿы аусқәа реиҿкаареи рҭышәынтәалареи ахәҭаны иҟоуп», – ҳәа иҳәеит Валери Бганба.
Џьансыхә Нанба Аминистрра ала аусмҩаԥгатәқәак мҩаԥгоуп, урҭ рылҵшәақәа рзы аофициалтә ҳасабырба адгалара жәабранмза 10 рзы имҩаԥган ҳәа адырра ҟаиҵеит.
«Ҳара шәҟәыла Шәара адырра шәаҳҭеит имҩаԥаагаз ауснагӡатәқәа рзы, уи зегьы аусшәҟәқәа рыхкьыԥхьқәа рыла ишьақәҳарӷәӷәеит. Аҟәатәи Аӡфымцатә Станциа аҟынтәи астанеиҵа Аҟәа-1 («Сухум-1) аҟынӡа инагоу афымцамҩангагатә цәаҳәа (ЛЭП 110 кВт) ахатә мазарахь аиагара азы Арбитражтә ӡбарҭа аӡбамҭа аҟазаара инамаданы акәзар, иазгәаҭатәуп афымцамчи атранспорти Рминистрра аҿы уи азы адырра ҳәа акагьы шыҟамыз. АУН «Амшынеиқәафымцамч» ахаҭарнакцәа роума Аҟәа араион Ахадара аума, аӡәгьы имҩаԥысуаз аӡбаратә усеилыргара азы ҳара адырра ҳаимҭаӡеит», – ҳәа иҳәеит Џьансыхә Нанба.
Арбитражтә ӡбарҭа аӡбамҭа атәы анеилаҳкаа афымцамчи атранспорти Рминистрра аофициалтә усшәҟәы – аӡбарҭа азыӡба зну атекст, иара убас иарбоу аӡбаратә усеилыргара иадҳәалоу егьырҭ аофициалтә усшәҟәқәа раиуразы аӡбарҭа ахь азыҳәамҭа дәықәнаҵеит.
«Афымцамчи атранспорти Рминистрра ари аус аганахьала апозициа еилкаауп. Афымцамҩангагатә цәаҳәа 110 кВт амҩангагатә ҳақәа ирыхәҭакуп, «Афымцамч азы» азакәан инақәыршәаны аҳәынҭқарратә мазараны иԥхьаӡазароуп. Ас еиԥш иҟоу аенергетика аусхкы иатәу аҳәынҭқарратә обиектқәа рганахьала изеиԥшразаалак альтернативақәа азԥхьагәанаҭаӡом», - ҳәа иазгәеиҭеит Џьансыхә Нанба.
Валери Бганба АУН «Амшынеиқәафымцамч» аинвентаризациа амҩаԥгара шхымԥадатәиу, избан акәзар иҿыцу афактқәа цәырҵыр алшоит ҳәа даҽазныкгьы иазгәеиҭеит.
Аҳәынҭқарра Ахада инапынҵақәа назыгӡо амассатә информациа ахархәагақәа аҵыхәтәантәи аамҭазы лассы-лассы астанциа хазхаҭалатәи ахаҿы ихатә мазараны иҟоуп ҳәа ирыҩуа иахьалагаз инамаданы, Аҟәатәи Аӡфымцатә Станциа ахатәра азинтә статус цқьа аилкаара азы аҳәара ҟаиҵеит.
Џьансыхә Нанба уи аинформациа мцыркуп, Аҟәатәи Аӡфымцатә Станциа аҳәынҭқарратә мазараны иҟоуп, АУН «Амшынеиқәафымцамч» анхамҩатә напхгараҭараҿы иҟоуп, уи 2012 шықәсазы 25 шықәса ҳәа қьырала ирыҭн ҳәа аҭак ҟаиҵеит.
«Иазгәасҭар сҭахуп, афымцамч азы иҟоу азакәанԥҵара инақәыршәаны, ари аобиект априватизациа азура алшаӡом. Згенерациа амчхара 5 мегаватт иреиҳау аобъектқәа зегьы априватизациа азура ҟалаӡом, урҭ аҳәынҭқарратә мазараны иҟоуп», – ҳәа инаҵшьны иазгәеиҭеит Џьансыхә Нанба.
Валери Бганба Аҟәатәи Аӡфымцатә Станциа аҿы агәаҭарақәа рымҩаԥгаразы апрокуратура ахь ашәҟәы дәықәиҵарц игәы иҭоуп.
«Аҳәынҭқарратә мазара азакәан аилагарала хазхаҭалатәи мазараны аҟалара залмыршахароуп. Ҳара иахьа ашәҟәы еиқәҳаршәоит. Сара аҳәара ҟасҵоит ишәылшо зегьы ҟашәҵарц, ианаҭахха административтә уснагӡатәқәа нашәыгӡарц. Ас аҳәынҭқарратә мазара аҟьара, аиҳарак ҳара ҳхаҭақәа иахьа аенергетикатә каллапс ҳзыҟаланы ҳаныҟоу аамҭазы, ҟалашьа амаӡам!», - ҳәа иҳәеит Валери Бганба.
