«Урыстәылатәи аструктурақәа зегьы ианакузаалакгьы аиашьаратә республика Аԥсны адгылара аҭара, ихымԥадатәиу аӡбарақәа ианаамҭоу рыӡбара алыршара иазырхан», – ҳәа иҳәеит ацҳаражәҳәаҩ. Убри ауп, урыстәылатәи адипломат иажәақәа рыла, хыԥхьаӡара рацәала Москва имҩаԥгаз Бадра Гәынба иԥыларақәа зызкыз.

Бадра Гәынба ихаҭаратә статус атәы ҳҳәозар, араҟа иарбанзаалак проблемеи ииашам аилкаарақәеи ыҟаӡам, иҟаларгьы ҟалом. Иара дзыҿцәажәоз ибзиаӡаны еилыркаауан уи иахьатәи аамҭазы Аԥсны аофициалтә ҳәынҭқарратә усбарҭақәа рхаҭарнак шиакәмыз. Москва иара еицырдыруа политикатә усзуҩык иаҳасабала ихәаԥшуеит, Урыстәыла анапхгара рхаҭарнакцәеи иареи иҭышәынтәалоу аусуратә еизыҟазаашьақәа змоу иоуп ҳәа дырдыруеит», – ҳәа инаҵшьны иазгәеиҭеит Михаил Шургалин.