Аҟәа. Жәабранмза 5, 2025 шықәса. Аԥсныпресс. Аԥсны Аҳәынҭқарра Ахада иалхрақәа раламҭалазы Урыстәылатәи Афедерациа Алхратә комиссиа Хада аҿы Урыстәыла алхратә комиссиа Хада ахантәаҩы Елла Памфиловеи Урыстәыла иҟоу Аԥсны ацҳаражәҳәаҩ Алхас Кәыҵниеи реиԥылара мҩаԥысит.
Аиԥылараҿы Алхас Кәыҵниеи Елла Памфиловеи Урыстәыла иҟоу алхырҭатә ҭыԥқәа рҿы ареспублика Ахада иалхрақәа раан абжьыҭара аиҿкаара азҵаарақәа ирылацәажәеит. Урыстәыла инхо Аԥсны атәылауаа рзы алхратә ҭыԥқәа ҩба аартхоит – Москвеи Черқьесски ақалақьқәа рҿы.
Елла Памфилова ишьақәлырӷәӷәеит акомиссиа аԥснытәи рколлегацәа иахьынӡалшо аиҿкааратәи атехникатәи цхыраара рыҭара ишазхиоу. Алхас Кәыҵниа Елла Памфилова иҭабуп ҳәа леиҳәеит адгылара азы. Абри атәы аанацҳауеит адипломатиатә хаҭарнакра апресс-маҵзура.
Аԥсны Ахада заанаҵтәи иалхрақәа жәабранмза 15 рзы имҩаԥысуеит. Жәларбжьаратәи анаԥшыҩцәа раҳасабала Аԥсныҟа иаауеит Урыстәыла Алхратә комиссиа Хада аделегациагьы.
