Ада Кәарҷелиа аинтернет аҿы ҳәара аҭахум хра злоу аинформациа рацәаны иуоур ҟалоит, аха даҽа ганкахьала уахәаԥшуазар, уи ашәарҭарагьы аҵоуп ҳәа иазгәалҭеит.  

«Шәареи ҳареи ҳхықәкы хаданы иҟоу – ашколхәыҷқәа рзы ишәарҭам аԥсҭазаашьеи аҭагылазаашьақәеи раԥҵара. Ари аглобалтә проблема аӡбаразы иаҭахуп агәазыҳәара дууи ахшыҩзышьҭреи. Убри азоуп ҳара ари азҵаара аӡбараҿы ацхыраара аҭара зылшо  аспециалистцәа задҳаԥхьалогьы», – ҳәа илҳәеит лара.

Апсихолог Елана Кортуа ишеиҭалҳәаз ала, Иулиа Дубовицкаиеи лареи зықәра наӡам ахәыҷқәа рықәараҿы ицәырҵуа аҟазшьа аҷыдарақәеи, насгьы ахәыҷқәа рыԥсҭазаара ашәарҭара иҭазыргыло ахәмаррақәа рыҽшаларгало ирызкны апрезентациа еиқәдыршәеит.

«Ари апрезентациа аҟны ҳара ҳҽазаҳшәеит иааркьаҿны зықәра наӡам ахәыҷқәа рҟазшьа аҷыдарақәа рылацәажәара, ахәыҷқәа иахьа зегьы злацәажәо ахәмарра «Синий кит» рыҽшаларгало, аҭаацәа, арҵаҩцәа, ашколтә психологцәа, егьыс ауааԥсырагьы, зегьы раԥхьаӡа иргыланы ахшыҩзышьҭра зырҭаша аҟазшьақәа, ацәырҵрақәа, аҭагылазаашьақәа ҳарзааҭгылеит. Ҳара иахьа ишәзеиҭаҳҳәоит зықәра наӡам ахәыҷқәа рыбжьара иҟоу аҽшьраҟынӡа уназго афакторқәеи ашәарҭарақәеи ртәы шәзеиҭаҳҳәоит», - ҳәа иазгәалҭеит Елана Кортуа.

Иулиа Дубицкаиа иахьа зегьы даараӡа акыр зҵазкуа атема алацәажәаразы араҟа еизеит ҳәа инаҵшьны иазгәалҭеит.

«Иахьа ҳара ҳхықәкы хаданы иҟоуп – ахәыҷқәа рықәра наӡаанӡа рҟазшьа аҽшаԥсахуа, ахәмаррақәа урҭ ишырныруа, насгьы зегьы реиҳа ихадоу азҵаара - уи ԥсыхәас иаҭатәузеи алацәажәара. Еиԥыларак аҳәаақәа ирҭагӡаны даараӡа иуадаҩуп ари атема нҭырҳәцааны алацәажәара, аха ҳара иахьа тезисла уи аарԥшра ҳҽазаҳшәоит», - ҳәа илҳәеит лара.

Алекциа ашьҭахь апсихологцәа аудиториа аҟынтәи ироуз азҵаарақәа жәпакы рҭак ҟарҵеит.

Аҵарадырреи абызшәатә политикеи Рминистрра ас еиԥш иҟоу алекциақәа ареспублика ашколқәа зегьы рыҟны имҩаԥнагалоит.