Аҟәа. Цәыббрамза 23, 2022 шықәса. Аԥсныпресс. Цәыббрамза 25 рзы Аҟәа ақалақь аҿы актәи аԥсуа романист Иван Гьаргь-иԥа Папасқьыр диижьҭеи 120-шықәса аҵра инамаданы IX Жәларбжьаратәи аҿартә арт-фестиваль «Аԥшаҳәаҿы анеиааира» мҩаԥгахоит.
«Афестиваль амҩаԥгара ахықәкы хаданы иҟоуп – ашәҟәыԥхьара, ашәҟәқәа, алитературатә ҟазара аиҳарак аҿар реилазаара аҟны апропагандеи апопулиаризациеи; аинтеллектуалтә ҿиара азы зегьы раасҭа иманшәалоу иақәнагоу аҭыԥ аҳасабала абиблиотекақәа рпопуляризациа», - ҳәа Аԥсныпресс акорреспондент диҿцәажәо иҳәеит И. Гь. Папасқьыр ихьӡ зху Амилаҭтә библиотека адиректор Борис Ҷолариа.
Уи иажәақәа рыла, ари ахықәкы анагӡара азы Аԥсны ауааԥсыреи асасцәеи афестиваль алахәхаразы радыԥхьалара иазкны еиуеиԥшым аформақәеи аметодқәеи ахархәара роуеит, акультура, аҟазара, ажәлар рҟазара иадҳәалоу еиуеиԥшым ажанрқәа рыдгалара азы афестиваль атерриториақәа еиҿкаахоит.
Афестиваль апринцип хадақәа ируаку уи ашьақәгылашьеи аиҿкаареи алахәылацәа рзы еиԥш аҭааҩцәа рызгьы имарианы аилкаара алыршара, арманшәалара.
Афестиваль рхы аладырхәыр алшоит уи азы агәазыҳәара шрымоу азы аиҿкааратә комитет ахь азыҳәамҭа алазҵаз зегьы.
Афестиваль аԥшьгаҩцәа – акультура Аминистрреи И.Гь. Папасқьыр ихьӡ зху Амилаҭтә библиотекеи.
Афестиваль апартниорцәа раҳасабала иқәгылоит Аԥсни Урыстәылеи акультура аусбарҭақәа, иара убас ареспублика ақалақьқәеи араионқәеи рхадарақәа.
Афестиваль аусмҩаԥгатәқәа рӷьырак Амилаҭтә библиотека ахыбра иахьаҵанакуа имҩаԥыслоит. Араҟа еиҿкаахоит:
- ашәҟәқәа рцәыргақәҵа, аԥсы зхоу ажәеи атетралтә қәгыларақәеи рыплошьадкақәа злагалоу алитературеи абиблиотекақәеи ртерриториа;
- амузеитә территориа, алабҿабатә ҟазареи амилаҭтә напҟазареи ртерриториа;
акәашареи амузыкеи рмода атерриториа, аспорт атерриториа, ахәыҷтәы плошьадка;
- амилаҭтә еилазаарақәа ртерриториа.
