Аҟәа. Ԥхынҷкәынмза 19, 2024 шықәса. Аԥсныпресс. Анаркотикатә маҭәашьарқәа изакәанымкәа раахәара, рыдгалара, рыиагара, иара убас Аԥсныҟа ралагалара азы ахара идҵоуп 1988 шықәса рзы ииз, Гәдоуҭа араион Лыхны ақыҭан инхо ахаҵа Рогава Нури Џьонди-иԥа.
«Атәылауаҩ Рогава Нури иарбоу ацәгьоураҿы дақәыркит Аԥсны аҩныҵҟатәи аусқәа Рминистрра Анаркотикқәа реикәыршара ахылаԥшра азы Аусбарҭа аусзуҩцәа. Урҭ имҩаԥыргаз аоперативтә усмҩаԥгатәқәа ирылҵшәаны, иарбоу атәылауаҩ имырхит «метадон» ҳәа изышьҭоу, зыкапан рацәаз акыр иџьбароу анаркотикатә маҭәашьар», – ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Ззин ыҟам амаҭәашьар Рогава Нури Урыстәыла иааихәеит, анаҩс Аԥсныҟа аиагараан, аҳәынҭқарратә ҳәаа Аушьҭра-гәаҭаратә Ҭыԥ аҿы аҩныҵҟатәи аусқәа Рминистрра анаркотикатә маҭәашьарқәа реикәыршара ахылаԥшра азы Аусбарҭа аусзуҩцәеи Аҳәынҭқарратә ҳазалхратә Еилакы аусзуҩцәеи рыла даанкылан.
Аусеилыргара мҩаԥнагоит Аԥсны атранспорттә прокуратура. Заанаҵтәи аусҭҵаара аамҭа иалагӡаны ахара зду дырбаандаҩуп.
