Аҟәа. Ԥхынҷкәынмза 19, 2024 шықәса. Аԥсныпресс. Ԥхынҷкәынмза 19, 2024 шықәса, асааҭ 13:00 инарзынаԥшуа, аекономикатә политикеи ареформақәеи рзы апарламенттә Еилакы аилатәараан, акриптовалиутақәа рмаининг ақәиҭымтәра азы азакәан апроект алацәажәараан адепутатцәа Кан Кәарҷиеи Адгәыр Ҳаразиеи аимак-аиҿак рыбжьалеит.
Адгәыр Ҳаразиа имаз амцамбџьар – макьаназы зыхкы шьақәыргылам атапанча ала ԥшьынтә еиҵамкәа дхысит. Убри иахҟьаны адепутат Вахтанги Голанӡиа игәы аганахьала ахы зылҟьаз ахәра иоуит, адепутат Кан Кәарҷиа – имышьхәылҵ аганахьала ахы зылҟьаз ахәра иоуит. Адепутат Ҳаразиа А.Р. иҟаиҵаз ацәгьоура ашьҭахь аҭыԥ аҟынтәи иҽиӡеит.
Иоуз ахәра иахҟьаны ареспубликатә хәышәтәырҭаҿы иԥсҭазаара далҵит адепутат Голанӡиа Вахтанги.
Азинхьчаратә усбарҭақәа адепутат Адгәыр Ҳарзиа дахьыҟоу аилкааразы аоператив-ԥшааратә усмҩаԥгатәқәа мҩаԥыргоит.
Ареспублика Аԥсны ашьаусеиҿкаартә закәанԥҵара инақәыршәаны, Апрокуратура Хада адепутат Адгәыр Ҳаразиа иҟаиҵаз иумҭа Аԥсны Ашьаустә закәанеидкыла ахәҭаҷ 99 ахәҭа 2 апункт «е», ахәҭаҷ 29 ахәҭа 2 рыла иазԥхьагәаҭоу ацәгьоурақәа — гәҭакрала азеиԥшшәарҭаратә уаҩшьреи азеиԥшшәарҭаратә уаҩшьра аҽазышәареи ирыҵанакуеит ҳәа алкаа аиуразы Иреиҳаӡоу аӡбарҭа ахь аматериалқәа еиқәнаршәоит.
Иреиҳаӡоу аӡбарҭа аколлегиа иҟанаҵаз алкаа инақәыршәаны, Аԥсны Жәлар Реизара-Апарламент ахь инашьҭхоит Адгәыр Ҳаразиа икьымсра ихыхреи иганахьала ашьаус ахацыркреи рзы азин рыҭаразы ажәалагала, ҳәа адырра ҟанаҵоит Аԥсны апрокуратура Хада аофициалтә саит.
