Иара агуманитартә миссиа алахәылацәеи аиҿкааҩцәеи зегьы иҭабуп ҳәа реиҳәеит, ари ацхыраара акыр аҵак ду амоуп ҳәа иазгәеиҭеит.

«Ари агуманитартә еидара Аԥсны жәлар рыхьӡала идәықәҵахоит. Иҭабуп ҳәа расҳәарц сҭахуп Лев Кәыҵниеи Алик Миносиани ари акыр зҵазкуа акциа ахьеиҿыркааз азы. Иахьа ауадаҩра иақәшәаз ауаа, иара убас Иҷыдоу арратә Операциа иалаху  ҳаҷкәынцәа адгылареи ацхыраареи рыҭара акырӡа аҵанакуеит. Ирзеиӷьасшьоит агәабзиареи иаарласны еибга-изҩыда доусы рҭаацәарақәа рыхь ихынҳәырц», - ҳәа иҳәеит Бадра Гәынба.  

Уи иара убас Урыстәыла атәылауаа иааиуа Ашықәсҿыц аныҳәа рыдиныҳәалеит, ирзеиӷьаишьеит агәабзиареи аҭынч ԥсҭазаареи.

«Ас еиԥш иҟоу аԥшьгарақәа ҳажәларқәа рыбжьара аиҩызаратәи аимабзиаратәи аизыҟазаашьақәа рырӷәӷәара аус аҿы акыр аҵанакуеит», - ҳәа иазгәеиҭеит иара.

Аԥсны Иҷыдоу аҭагылазаашьақәа рзы аминистр, Урыстәылатәи Афедерациа арегион ҿыцқәа рымадара азы Аԥсны Аҳәынҭқарра Ахада аҷыдалкаатә зинмчы змоу ихаҭарнак Лев Кәыҵниа иажәақәа рыла, ас еиԥш иҟоу акциақәа абар шьҭа жәа-шықәса инареиҳаны имҩаԥысуеит.  

«Арҭ ауаҩра иадҳәалоу агәыҳалалратә акциақәа акыр аҵак ду рымоуп. Ҳара уахь ҳаннеилак даара гәахәарыла иаҳԥылоит, иҭабуп ҳәа ҳарҳәоит, даара пату ақәырҵоит иҟаҳҵо аус. Ҳара Аԥсны уажәы урҭ зҭагылоу ауадаҩрақәа ртәы ибзиаӡаны иаҳдыруеит, ҳара жәларыки атәыла анапхгареи раҳасабала  иааҳарԥшуа агәцаракреи адгылареи дара  рзы акырӡа аанагоит», – ҳәа инаҵшьны иазгәеиҭеит иара.

Аԥсны аерманцәа Рхеилак ахада Алик Миносиан агуманитартә еидара азы амандаринақәа Аԥсны ауааԥсыра рыла еизган, насгьы ас еиԥш иҟоу атрадициа Ашықәс Ҿыц аламҭалазы ҷыдала акыр аҵанакуеит ҳәа иазгәеиҭеит.

«Ҳара ари ацхыраара ахәыҷқәеи асолдатцәеи аныҳәа гәырӷьарала иаԥыларц азы идәықәаҳҵоит. Иҟаҳҵо зегьы Урыстәылатәи Афедерациа арегион ҿыцқәа руааԥсыра ацхыраара рыҭара иазкуп, гәыкала иаҳҭахуп аныҳәазы дара ҳмандаринақәа ргьама рбарц», - ҳәа иҳәеит Алик Миносиан.

Акциа еиҿкаахеит Аԥсны аерманцәа Рхеилак, Аԥснытәи ацитрусттә Еилазаареи афонд «Амшен» рыла. Убри аан активла ацхыраара ҟанаҵеит Аԥсны Иҷыдоу аҭагылазаашьақәа рзы Аминистрра.

Агуманитартә  еидара иалоуп 80 тонна амандаринақәеи  30 тонна рҟынӡа апаҭлыкақәа ирҭоу аӡрыжәтәи. Аидара зқу амашьынақәа дәықәҵоуп Донецктәии Лугенсктәи Жәлартә Республикақәа, Курсктәи аобласт, Запорожие, Херсон., уҳәа егьырҭ афронт иаԥну арегионқәа рахь.  Аидара ԥшьымш амҩа иқәзаауеит.