Аҟәа. Цәыббрамза 21, 2022 шықәса. Аԥсныпресс. Атуристтә аамҭахәҭа абжьакӡаратә еихшьаалақәа рыҟаҵара иазкын атәыла атуризм аминистр Ҭеимураз Хьышба атуризм Аминистрра аситема иаҵанакуа аҳәынҭқарратә унитартә наплакқәа рдиректорцәа алархәны имҩаԥигаз аусуратә еилатәара. Абри атәы аанацҳауеит атуризм Аминистрра апресс-маҵзура.
Аилатәара рхы аладырхәит Апансионатқәа Реидгылара «Акурорт Пицунда» адиректор Фрикан Гәынба, Афонҿыцтәи аҳаԥы Акомплекс адиректор ихаҭыԥуаҩ Дамеи Смыр, апансионат «Аиҭар» адиректор Ҭемыр Адлеибеи амилаҭтә туристтә Еилазаара «Атурист» адиректор Руслан Кокосқьериа, иара убас атуризм аминистр ихаҭыԥуаҩцәа Дмитри Занҭариеи Асҭамыр Барцыци.
Аилатәара иалахәыз атуристә усхкы аҿы ишьақәгылаз аҭагылазаашьа иалацәажәеит, атуристтә аамҭахәҭа абжьакӡаратә еихшьаалақәа ҟарҵеит, Аԥсны атуристә аалыҵ аӡыргара иазку аусмҩаԥгатәқәа реицынагӡара аҽазыҟаҵара азҵаарақәа ирзааҭгылеит.
Атуристә обиектқәа рдиректорцәа аминистр аԥхынра акурорттә аамҭахәҭа азы имҩаԥгаз аусура азы адырра ирҭеит.
Ҭеимураз Хьышба атуризм Аминистрра иаҵанакуа аунитартә наплакқәа русура иааизакны ахәшьара бзиа аиҭеит.
