Аҟәа. Ԥхынҷкәынмза 11, 2024 шықәса. Аԥсныпресс. Беслан Бараҭелиа Аԥсны Абанк ахантәаҩыс деиҭалырхит.
Имаӡоу абжьыҭирала Беслан Бараҭелиа икандидатура азы рыбжьы арҭеит 25 - ҩык адепутатцәа.
Беслан Бараҭелиа диит цәыббрамза 11, 1977 шықәса рзы Аҟәа ақалақь аҿы. Ибзиаӡаны далгеит Аҟәатәи абжьаратәи ашкол № 10, убасҵәҟьа ибзиаӡаны далгеит М.Ломоносов ихьӡ зху Москватәи Аҳәынҭқарратә Университет (МГУ), Великобританиа Лондонтәи аекономика ашкол аҿы дахысит аҵаратә курс «Аҿиара иаҿу атәылақәа рекономика» («Экономика развивающихся стран»), аекономикатә наукақәа ракандидат ҳәа аҵарауаҩ иҩаӡара имоуп.
2005 шықәсазы Ареспублика Аԥсны Ахада Иусбарҭа аекономикеи азини рыҟәша ареферент еиҳабыс аус иуан, Аԥснытәи аҳәынҭқарратә Университет аҿы алекциақәа дрыԥхьон.
Жьҭаарамза, 2014 шықәса рзы Ареспублика Аԥсны Ахада Иусбарҭа аекономика Аҟәша аиҳабыс дҟаҵан, иара убри ашықәсан, ԥхынҷкәынмза 29 рзы Аԥсны Жәлар Реизара-Апарламент адепутатцәа рыла Аԥсны Амилаҭтә Банк ахантәаҩы имаҵураҿы дшьақәырӷәӷәахеит.
