Аҟәа. Ԥхынҷкәынмза 9, 2024 шықәса. Аԥсныпресс. Ԥхынҷкәынмза 13 рзы, аиубилеитә XXX Жәларбжьаратәи акинофестиваль «Сталкер» аусура аҳәаақәа ирҭагӡаны,асахьаркыратә фильм «Аҵыхәтәантәи ахәԥса» (ареж. Наур Гармелиа) москватәи арбара мҩаԥгахоит, ҳәа адырра ҟанаҵоит Урыстәыла акинорежиссиорцәа Ргильдиа апресс-центр.
Наур Гармелиа ифильм акинематограф аҿы акыр зҵазкуа хҭысны иҟалеит, уи ипрестижу аҳамҭақәагьы аиухьеит. «Аҵыхәтәантәи ахәԥса» аҭыхрақәа Аԥсны имҩаԥысуан.
Аиубилеитә XXX Жәларбжьаратәи акинофестиваль «Сталкер» мҩаԥысуеит 2024 шықәса, ԥхынҷкәынмза 9 -15 рзы Москва ақалақь аҿы.
Аконкурсттә программа иалоуп – ахәмарратә, адокументалтә кино, иара убас анимациа. Арбара аламҭалазы – акинолентақәа равторцәа рԥыларақәа мҩаԥысуеит.
«Сталкер» – иреиҳау урыстәылатәи акинорбарақәа иреиуоуп, уаҟа идырбахоит ашықәсазы иреиӷьу афильмқәа. Зынӡа афестиваль аҿы ицәыргахоит 60 инарзынаԥшуа аусумҭақәа. Аконкурсттә программа иалахәуп 57 фильм, урҭ рахьынтә 12 зметраж наӡоу роуп, 13 зметраж кьаҿу ахәмарратә фильмқәа роуп, 17 адокументалтә, иара убас 15 анимациатә фильмқәа.
