Аҟәа. Абҵарамза 28, 2024 шықәса. Аԥсныпресс. Аҳәынҭқарра Ахада инапынҵақәа назыгӡо Бадра Гәынба иҟаиҵаз анапынҵа ала, Урыстәылантәи иаашьҭхо афымцамч ахәԥса ашәаразы аԥаратә хархәагақәа рыԥшаара алыршахеит. Иарбоу аԥаратә хархәагақәа реицҵалыҵ ахаша, ԥхынҷкәынмза 4 аҟынӡа иаашьҭхо афымцамч ахәԥса ашәара иазхоит. Абри азы Бадра Гәынба адырра ииҭеит атәыла аԥыза-министр актәи ихаҭыԥуаҩ, аенергетикеи атрансорти рминистр инапынҵақәа назыгӡо Џьансыхә Нанба.
Абҵарамза, 2024 шықәса инаркны акоммерциатә шьаҭала Урыстәылантәи иаашьҭхо афымцамч азы зынӡа ишәан 510 миллион мааҭ. Ҳазҭоу ашықәс абҵарамза 27 инаркны иарбоу ахықәкқәа рзы инацҵаны иазоужьхеит 90 миллион мааҭ. Иарбоу аӡбамҭа ареспублика аенергетикатә шәарҭадареи ауааԥсыра рыԥсҭазаара арманшәалареи иазырхоуп.
