Аҟәа. Абҵарамза 27, 2024 шықәса. Аԥсныпресс. Аԥсны аинтеллигенциа Реидгыла II Аизара Ду аҿы далхын Аидгыла ахантәаҩы ҿыц — Нодар Ҷанба.
Аизара Ду аделегатцәа атәыла аҿы ишьақәгылаз ауаажәларра-политикатә ҭагылазаашьа, имҩаԥысраны иҟоу Аҳәынҭқарра Ахада иалхрақәа, иҟалар зылшо Аԥсны Аконституциа аиҭакрақәа ралагалара, уҳәа актуалра злоу азҵаарақәа жәпакы ирылацәажәеит. Иҟаҵаз ажәалагалақәа иреиуахеит адепутатцәа рзы ишьақәырӷәӷәоу ақәратә ценз ашьҭыхра, иара убас Аԥсны Аҳәынҭқарра изинмчы аҽҳәара агырхара.
Иара убас иалацәажәеит Аԥсны анаука аҿиара афинансыркра азымхара азҵаарагьы.
Аусмҩаԥгатә хыркәшахеит абжьыҭирала. Уи ала Аԥсны аинтеллигенциа Реидгыла ахантәаҩыс дылхын Нодар Ҷанба, уи ихаҭыԥуаҩыс - Ныгәзар Логәуа.
Аизара Ду иалахәыз рхыԥхьаӡараҿы иҟан аинтеллигенциа ахаҭарнакцәа Ныгәзар Логәуа, Нодар Ҷанба, Виачеслав Чыркба, Витали Џьениа, Владимир Занҭариа, Олег Дамениа, уҳәа убас аӡәырҩы.
