Аҟәа. Абҵарамза 26, 2024 шықәса. Аԥсныпресс. Фазиль Искандер ихьӡ зху Аҳәынҭқарратә аурыс драматә театр Иошкар-Ола ақалақь аҿы агастрольқәа рымҩаԥгара аҳәаақәа риҭагӡаны ахәаԥшцәа иднарбеит аспектакль «Ахьча Махаз».
Ареспублика Марии Ел ахь Аԥснытәи атеатр Урыстәыла амилаҭтә республикақәеи аҳәаанырцәтәи атәылақәеи рҟынтәи аурыс театрқәа ХХI Жәларбжьаратәи афестиваль «Аиҩызара ацҳа» алахәхаразы ааԥхьара аиуит. Фазиль Искандер ихьӡ зху Аԥсны Аҳәынҭқарратә аурыс драматә театр ахада Иракли Хьынҭәба хаҭала ари ааԥхьара уажәаԥхьа Аԥсны усуратә визитла иаҭааз ареспублика Марии Ел Анапхгара ахантәаҩы ихаҭыԥуаҩ, акультура аминистр Константин Иванов иҟынтәи иоуит.
Иазгәаҭатәуп, Фазиль Искандер ихьӡ зху Аԥсны Аҳәынҭқарратә аурыс драматә театр иарбоу афестиваль абар шьҭа ҩынтәны ахы шаланархәуа – 2019 шықәсазы Иошкар-Ола ауааԥсыра идырбан аиахьа уажәраанӡа ргәы иҭымҵәо акомедиа «Кьоджинские перепалки». Ахәаԥшыҩ Ольга Риабова лҩыза длыцны хықәкыла Аҟәантәи иааз атруппа аспектакль дахәаԥшырц азы дшааз лҳәеит: «Ҳара хәы-шықәса раԥхьа аспектакль «Кьоджинские перепалки» ҳахәаԥшхьан. Уажәы хықәкыла аспектакль «Ахьча Махаз» ҳахәаԥшырц азы афестиваль ҳаҭааит. Аиашазы, абилеҭқәа раиура маҷк иуадаҩуп, уи зыхҟьаз азҿлымҳара ду иамоу ауп».
