Ҽҳәараанӡатәи алхрақәа Ареспублика Аԥсны Ахада инапынҵақәа анышьҭеиҵа инаркны хымз рыҩныҵҟа имҩаԥгазароуп.
Аҳәынҭқарра Ахада Аслан Бжьания инапынҵақәа шьҭеиҵеит абҵарамза 19, 2024 шықәса рзы. Убас ала Аҳәынҭқарра Ахада ҽҳәараанӡатәи иалхрақәа рымҩаԥгара арыцхә жәабранмза 19, 2025 шықәса иахымгакәа ишьақәыргылазар ауп.
Ареспублика Аԥсны Аконституциеи «Ареспублика Аԥсны Ахада иалхрақәа рзы» аконституциатә закәани инарықәыршәаны, Аҳәынҭқарра Ахадас далхзар ҟалоит милаҭла иаԥсыуоу, зхатәы бызшәа ибзианы издыруа, 35 шықәса ирхысхьоу, 65 шықәса ирҭымсыц, алхратә зин змоу, алхрақәа рҟынӡа иаԥхьанеиуаз 5-шықәса рыҩныҵҟа иааиԥмырҟьаӡакәа Аԥсны инхоз Аԥсны Аҳәынҭқарра атәылауаҩ.
Аҳәынҭқарра Ахада 5-шықәса азинмчы аҽҳәара иманы далххоит.
Хаҿык инеиԥынкыланы Аҳәынҭқарра Ахадас далхзар ҟалоит ҩ-ҽҳәарак иреиҳамкәа. Аҳәынҭқарра Ахада иалхраан аамҭак ала далххоит Аҳәынҭқарра Ахада Ихаҭыԥуаҩ. Уи Аҳәынҭқарра Ахадас иқәгылоу дицқәгылоит.
Аҳәынҭқарра Ахада Ихаҭыԥуаҩыс далхзар ҟалоит 35 шықәса ирхысхьоу, 65 шықәса ирҭымсыц, алхратә зин змоу, алхрақәа рҟынӡа иаԥхьанеиуаз 5-шықәса рыҩныҵҟа иааиԥмырҟьаӡакәа Аԥсны инхоз Аԥсны Аҳәынҭқарра атәылауаҩ.
