Аҟәа. Цәыббрамза 22, 2022 шықәса. Аԥсныпресс. Цәыббрамза 28 инаркны жьҭаарамза 2 аҟынӡа Аҟәа ақалақь аҟны 1992-1993 шш. Аԥсны Аџьынџьтәылатәи еибашьра аҿы Аиааира агара азгәаҭара инамаданы, ахацәа-аветеранцәа ркомандақәа рыбжьара амҵәышәмпыл азы Иааарту атурнир мҩаԥыслоит, ҳәа иаанацҳауеит Аԥсны аҿари аспорти русқәа рзы аҳәынҭқарратә Еилакы апресс-маҵзура.
Атурнир аҿы аԥсуа спортсменцәа реиԥш рхы аладырхәраны иҟоуп урыстәылатәи ақалақьқәа Новосибирск, Волгоград, Ростова-на-Дону, Черкесск, Новороссиск, Славианск-на-Кубани, Ессентуки рҟынтәи аспортсменцәагьы.
Ахәмаррақәа ирылагоит – цәыббрамза 28, асааҭ 11:00 рзы. Атурнир аартра иадҳәалоу ацеремониа мҩаԥгахоит цәыббрамза 29, асааҭ 13:00 рзы.
Атурнир Ареспубликатә ахәыҷтәы-қәыԥштә спорттә школ аҿы имҩаԥыслоит (Надежда Курченко лыхьӡ зху апарк).
Атурнир аӡбаҩ хада - Алеқсандр Банников (ақ.Краснодар).
Атурнир аиҿкаара ахахьы иагоит Аԥсны аҿари аспорти рзы аҳәынҭқарратә Еилаки Аԥсны амҵәышәмпыл азы Афедерациеи.
