Атәылаҿы аколлабс ҳәа акгьы ҟамлаӡеит, ҳәа иԥхьаӡоит Гал араион ахада Константин Ԥлиа.

«Аструктурақәа зегьы абжьааԥны еиԥш аус руеит. Иҟалазеи нас? Ари ҳзышьцылахьоу усуп ҳара иацы иаабаз. Сара сгәаанагарала, ари аанкылатәуп, ҳашьцылазшәа сбоит. Иазхоит!  Есымша атәыла ҳархыџхыџуеит, ари абзиарахь ҳкылнагаӡом! Алхрақәа мҩаԥысааит, ажәлар рхатә гәаанагара рҳәааит, рыбжьы ирҭааит иалырхуа акандидат. Зегьы ирыцку, уажәы ҳаангылароуп», – ҳәа иҳәеит Константин Ԥлиа.

Иара иазгәеиҭеит атәылақәа жәпакы рҿы ари аҩыза ҟалалоит, аибарххарақәа цәырҵуеит, аха ҳҽазаҳшәароуп ари аҩыза уаҳа иҟамларц азы аусура.  

«Ҳара ҳҳәынҭқарраны ҳхы ҳаԥхьаӡозар, ас еиԥш иҟоу аҭагылазаашьақәа ҟамлалароуп», -ҳәа иҳәеит Константин Ԥлиа.

Иара убас дықәгылеит Жәлар Реизара-Апарламент адепутат Леонид Лакербаиа. Уи абҵарамза 15 рзы иҟалаз ахҭыс аԥсуа ҳәынҭқарра азы шәарҭара дууп ҳәа иазгәеиҭеит.  

«Ҳакәша-мыкәша иҟоу аҭагылазаашьа ҳасаб азуны, ҳазҭагылоу аамҭа ҳазхәыцны ҳахәаԥшуазар, иахьа иҳамоу Аԥсны агәаӷ змоу изы иҳамҭа бзиоуп», — ҳәа иҳәеит иара.

Леонид Лакербаиа аҳәынҭқарра аконституциатә мҩала аҿиара аиуроуп ҳәа инаҵшьны иазгәеиҭеит.  

«10 шықәса раԥхьа ирыдыркылаз изакәаным, аконституциа еилазго аӡбамҭа ҟалаӡом уажәы, усҟан Апарламент акала иҵаҵӷәыркымкәа Аҳәынҭқарра Ахада ԥхьатәара ишьҭра азы аӡбамҭа аднакылеит», –  ҳәа иҳәеит иара.

Уи иажәақәа рыла, Апарламент апозициақәа еидызкыло плошьадканы иҟалоит.

Леонид Лакербаиа ишьақәгылаз аҭагылазаашьа Аԥсны астратегиатә партниорс иҟоу, уажәы иҷыдоу арратә операциа амҩаԥгара иаҿу Урыстәылатәи  Афедерациагьы акыр иаԥырхагоуп ҳәа иазгәеиҭеит.