Аҟәа. Абҵарамза 16, 2024 шықәса. Аԥсныпресс. «Аҭагылазаашьа ҭышәынтәалахоит, ҳара зегьы уи азин мҩахь иҳаргьежьуеит», – ҳәа аиҳабыра алахәылацәа алархәны Тамшь имҩаԥигаз аусуратә еилатәара аҿы аҳәамҭа ҟаиҵеит Аҳәынҭқарра Ахада Аслан Бжьаниа.
«Аҳәынҭқарра Ахадеи анапхгареи рахҳәара аҽазышәара шыҟазгьы, шәареи ҳареи ҳусура иацаҳҵоит, уимоу, иҳарӷәӷәоит. Аҳәынҭқарра Ахада идҵақәеи иқәҵарақәеи нашәыгӡала», — ҳәа иҳәеит иара. Аслан Бжьаниа аминистррақәеи ахылаԥшырҭақәеи рнапхгаҩцәа рықәыӷәӷәара алыршатәӡам ҳәа иԥхьаӡоит.
«Дыҟоуп Аҳәынҭқарра Ахада, иҟоуп азакәан, иҟоуп Аԥсадгьыл, уи ҳара иҳахьчароуп», – ҳәа иҳәеит иара. Уи иара убас амчратә структурақәа русзуҩцәа зегьы аҭыԥқәа рҿы иҟоуп, рмаҵуратә уалԥшьа нарыгӡоит ҳәа иазгәеиҭеит.
Аԥсны амедицинатә усбарҭақәа зегьы абжьааԥнытәи арежим ала аус руеит, ҳәа адырра ҟаиҵеит агәабзиарахьчара аминистр Едуард Быҭәба.
«Агәабзиарахьчара Аминистрра абжьааԥнеиԥш аус ауеит. Сара сҭелқәа аҿакуп, сымадаразы уадаҩра ыҟаӡам», – ҳәа иазгәеиҭеит Едуард Быҭәба.
Уи абҵарамза 15 рзы анапхгаратә хыбрақәа ркомплекс аҿаԥхьа иҟалаз аидысларақәа раан зынӡа еиуеиԥшым ахәрақәа рыманы ареспубликатә хәышәтәырҭа Хада иадҵаалеит 14-ҩык атәылауаа ҳәа Аҳәынҭқарра Ахада адырра ииҭеит. Зегьы иахәҭоу амбулатортә еиԥш астационартә медицинатә цхыраара роуит.
Афымцамчи атранспорти рминистр Џьансыхә Нанба Аԥсны афымцамч азы аҭагылазаашьа ҭышәынтәалоуп ҳәа аҳәамҭа ҟаиҵеит.
Иара инаҵшьны иазгәеиҭеит иааиуа амчыбжь анҵәамҭазы 650 миллион мааҭ раҟара шшәатәу Аԥсны фымцамчыла ашықәс нҵәаанӡа аиқәыршәаразы.
Уи адагьы Џьансыхә Нанба Аҟәатәи аҳаиртә баӷәаза атехникатә ган ала аҳаирпланқәа рыдкылара иазхиоуп ҳәа адырра ҟаиҵеит.
«Атехникатә ԥыррақәа рзы аусурақәа лыԥхала ихыркәшоуп, урҭ аеродромтә хәҭа атехникатә ҭагылазаашьа агәаҭара иаҵанакуа аҵыхәтәантәи хәҭаны иҟоуп», — ҳәа аҳәамҭа ҟаиҵеит афымцамчи атранспорти рминистр Џьансыхә Нанба Аҳәынҭқарра Ахада Аслан Бжьаниа имҩаԥигаз аилатәараан.
Аԥыза-министр Кристина Озган иацылҵеит Урыстәыла Авиациа анапхгаҩы хаҭала адырра шыҟаиҵаз аҳаирбаӷәаза атехникатә ҷыдарақәа зегьы анорма ишақәшәо.
Аҟәатәи аҳаирбаӷәаза аусура аларгаразы аҽазыҟаҵарақәа азгәаҭаны ишыҟаз еиԥш ицоит ҳәа иажәа иацҵо иҳәеит Џьансыхә Нанба.
«Анапынҵақәа зегьы рынагӡара ҳаҿуп, аԥхьаҟагьы инаҳагӡалоит. Азҵаарақәа цәырҵуазар, оперативла адырра шәаҳҭалоит», — ҳәа иара Аслан Бжьаниа иеиҳәеит.
Аԥсны аԥыза-министр ихаҭыԥуаҩ, афинансқәа рминистр Владимир Делбагьы аҭагылазаашьа ахҳәаа аиҭеит. Иара иажәақәа рыла, афинансқәа Рминистрра аҳәынҭқарра иаду аҭакԥхықәрақәа зегьы рԥаразоужьра азакәан инақәыршәаны имҩаԥнагоит ҳәа.
Владимир Делба Урыстәылантәи аԥаразоужьра шаанкылоугьы, ҳамчқәа асоциалтә хыдҵақәа зегьы рынагӡара иазырхоуп ҳәа азгәеиҭеит иара.
«Аԥара азоуҳашьҭуеит Аԥсны анҭыҵ ҳтәылауаа рыхәышәтәрагьы. Уаанӡеиԥш, уажәгьы шәнапынҵала аԥаратә цхыраара раҳҭоит аԥсҭазаараҿы иуадаҩу аҭагылазаашьа иақәшәаз ауаа", — иҳәеит афинансқәа рминистр Владимир Делба.
