Ҳара иаҳҭахӡам ҳаҷкәынцәа ӷәӷәала ахәрақәа роур, Шәара шәеиԥш ҳаргьы уи азы ӷәӷәала агәҭынчымра ҳамоуп. Ҳара ҳаблала иаабеит анапхгаратә хыбрақәа ирыҩналарц иақәызкыз ауаа шаҟа агрессиа аадырԥшуаз уи зыхьчоз ҳусзуҩцәа рганахьала», – ҳәа иҳәеит аминистр.
Аминистр иажәақәа рыла, аусбарҭақәеи ахылаԥшырҭақәеи зегьы адҵаҟаҵаҩ Хада инапхгарала абжьааԥнытәи арежим ала аус руеит.
«Аӡәгьы џьаргьы ацара игәы иҭаӡам. Избоит иахьа ана-ара аоппозициа ахаҭарнакцәа џьоукы-џьоукы ахәҭакахьала сара ԥхьатәара сцароуп ҳәа аҳәамҭақәа шыҟарҵо. Уи аҭакс иазгәасҭар сҭахуп абас: сара зҳәатәы насыгӡало адҵаҟаҵаҩ Хада дсымоуп. Ажәлар далырхит Аҳәынҭқарра Ахада. Ҳара уи иҳәатәы ҳақәныҟәалоит», – ҳәа инаҵшьны иазгәеиҭеит Роберт Киут.
