Ахәыҷқәа Аҟәа ақалақь асасааирҭақәа руак аҿы ареабилитациа акурс иахысраны иҟоуп. Иахьа шьыжьы инаркны  Адлертәи  авокзал аҿы Урыстәыла Иҷыдоу аҭагылазаашьақәа рзы Аминистрра атәылаҿацәтә Усбарҭа аҟынтәи рколлегацәа рыцны Аԥсны Иҷыдоу аҭагылазаашьақәа рзы Аминистрра аусзуҩцәа Курсктәи аобласт аҟынтәи иааз ахәыҷқәа ирԥылеит. Анаҩс, ҷыдала уи азы иазоужьыз автобус ала, Аԥсны аҩныҵҟатәи аусқәа Рминистрра иатәу Аҳәынҭавтоинспекциа аусзуҩцәа ацны, ахәыҷқәа Аԥсны аҳҭнықалақь ахь амҩа иқәлеит. Ахәыҷқәа Аԥсныҟа раара азы аиқәшаҳаҭра бжьаҵан ааигәа имҩаԥысыз Аԥсны Иҷыдоу аҭагылазаашьақәа рзы аминистр Лев Кәыҵниеи Курсктәи аобласт агубернатори реиԥылара аҿы.