Асааҭ 13:30 рзы – апротесттә акциа мҩаԥызго ауаа  аихаанда даҽа хәҭақәак дырбгеит.

Асааҭ 13:35 рзы – апротест мҩаԥызго ауаа рахь ицәырҵит   аҩныҵҟатәи аусқәа рминистр Роберт Киути Аҳәынҭқарратә шәарҭадара Амаҵзура ахантәаҩы Дмитри Кәычбериа. Урҭгьы убасҵәҟьа дара иқәдыргыло адҵақәа Аҳәынҭқарра Ахада иҟынӡа ишнарго  азы ажәа рырҭеит.

Асааҭ 14:20 рзы – Аԥсны ауаҩы изинқәа рыхьчаразы  Азинмчы змоу Анас Кьышьмариа Жәлар Реизара-Апарламент адепутатцәа рахь, ауаажәларра рҿы иҟоу аиҿагылареи, аҭагылазаашьа аибарххареи инарымаданы атәылаҿы аилаҩынтрақәа хацзыркуа азҵаарақәа  рыхәаԥшра, ааигәа имҩаԥысраны иҟоу  Ареспублика Аԥсны Ахада иалхрақәа рҟынӡа анаскьагара   алдыршарц азы ааԥхьара ҟалҵоит.  Уи иара убри аамҭазы азинхьчаратә усбарҭақәа рахьгьы азин еилазгаз рганахьала амч ахархәара азԥхьагәазҭо аҭагылазаашьа аан иҟоу азакәанқәеи ауснагӡатәқәа реизышәазаара апринципқәеи  рықәныҟәара ахымԥадатәра азы ааԥхьара ҟалҵеит. Аомбудсмен иара убас аоппозициа аԥызацәеи апротестә акциа алахәылацәеи  рахьгьы азакәан аҳәаақәа ирҭагӡаны ахымҩаԥгареи амч  ахархәара мап ацәкреи рзы аҳәара ҟалҵеит.

Асааҭ 14:25 рзы – ааҩык Ареспубликатә хәышәтәырҭа ахь инаган, ҳәа Аԥсныпресс ахь адырра ҟарҵеит атәыла агәабзиарахьчара Аминистрра аҿы.  Амедицинатә цхыраара зҭахыз зегьы иахәҭоу ацхыраара рыҭан. Аӡәы ахәышәтәырҭаҿы даанхеит аҳақьымцәа рхылаԥшра аҵаҟа, егьырҭ амбулатортә хәышәтәра рзалхуп.

Асааҭ 14:55 рзы – Аҳәынҭқарра Ахада Аслан Бжьаниа Аҟәа ақалақь аҿы дыҟоуп. Уажәы Аҳәынҭқарра Ахада ареспублика аҿы аҭагылазаашьа аҭышәынтәаларазы ауснагӡатәқәа мҩаԥигоит, ҳәа адырра ҟанаҵоит Аҳәынҭқарра Ахада ипресс-маҵзура.

Асааҭ 15:05 рзы – Уажәы  Аҳәынҭқарра Ахада Иусбарҭа «Урыстәылатәи Афедерациа Анапхгареи Аԥсны Аҳәынҭқарра Анапхгареи рыбжьара урыстәылатәи аиуристтә хаҿқәа рыла Ареспублика Аԥсны иахьаҵанакуа аинвестициатә проектқәа рынагӡара азы Аиқәшаҳаҭра аратификациа азы» азакәан апроект Жәлар Реизара-Апарламент аҟынтәи архынҳәра азы аусшәҟәы аиқәыршәара иаҿуп, ҳәа адырра ҟанаҵоит Аҳәынҭқарра Ахада ипресс-маҵзура. Ас еиԥш аӡбамҭа ареспублика аҿы аҭагылазаашьа аҭышәынтәалара хықәкыс иҟаҵаны ирыдыркылеит. Уи аамҭазы апротест мҩаԥызго ауаа аиҿцәажәарақәа иахьрыдхалацәаз азы агәынамӡара аадырԥшуеит, азынџьырқәа рыла аԥенџьырқәа ирҭагылаз аихыршьқәа ыҵыржәеит. Урҭ анапхгаратә хыбрақәа ааныркылеит, Аҳәынҭқарра Ахада ԥхьатәра дцеит ҳәа адырра роуаанӡа араантәи ишымцо азы аҳәамҭагьы ҟарҵеит.   

Асааҭ 15:10 рзы – апротест мҩаԥызго ауаа Апарламент аԥенџьырқәа ҩба ирҭагылаз аихыршьқәа ыҵжәааны, ахыбра аҩныҵҟа иҩналеит.

Асааҭ 15:15 рзы – Аоппозициа ахаҭарнакцәа Аҳәынҭқарра Ахада ԥхьатәара ишьҭра азы адҵа ықәдыргылоит.

Асааҭ 15:40 рзы – Аԥсны Жәлар Реизара-Апарламент ахыбреи Аҳәынҭқарра Ахада Иусбарҭа ахыбреи апротесттә акциа мҩаԥызго ауаа рыла иаанкылоуп.  

Асааҭ 16:10 рзы –  Аоппозициа аԥхьагылаҩцәа рхаҭарнак Леуан Миқаа Аҳәынҭқарра Ахада Иусбарҭа аконференц-зал аҿы араҟа еизаз ауаа Аҳәынҭқарра Ахада ԥхьатәара ишьҭра азы аӡбамҭа шрыдыркылаз азы адырра роуаанӡа џьаргьы ишымцо азы аҳәамҭа ҟаиҵеит.

Асааҭ 17:20 рзы – Апарламент адепутатцәа гәыԥҩык Аҳәынҭқарра Ахада иҿцәажәаразы идәықәлеит.