Аԥсны Аҳәынҭқарра Ахада Аслан Бжьаниа аҵарауаҩ ииубилеи идиныҳәалеит.
Адныҳәалартә шәҟәаҿы, ахәҭакахьала иаҳәоит:
«Ҳаҭыр зқәу апрофессор Џьорџь Хьиуитт!
Гәык-ԥсык ала ишәыдысныҳәалоит 75 шықәса шәхыҵра.
Ахә ашьара уадаҩуп аԥсуа бызшәа аҭҵаареи уи аӡыргареи рус аҟны Шәара шәлагала. Ааԥсарак шәықәымкәан, Аԥсны иашәҭо адгылареи ацхыраареи ирыбзоураны ишәырҳаит аԥсуа жәлар ргәыбылра.
Ҳаамҭазтәи Аԥсны аҭоурых аҿы иуадаҩӡаз аамҭақәа рзы Шәара ишәылшәыршаз рацәоуп Аԥсны имҩаԥысуаз ахҭысқәа рзы аиаша адунеи аларҵәара аус аҿы. Уи азы лымкаала иҭабуп ҳәа шәаҳҳәоит.
Ҳаҭыр зқәу Џьорџь Хьиуитт, ишәзеиӷьасшьоит агәабзиара, ҭаацәаныла аманшәалара, шәнапы злаку аусқәа рҿы аихьӡарақәа».
Ҳаҭырла,
Аԥсны Аҳәынҭқарра Ахада
А. Гь. Бжьаниа.
