Аҟәа. Абҵарамза 7, 2024 шықәса. Аԥсныпресс. Очамчыра араион Џьгьиарда ақыҭан афершар-акушертә пункт ҿыц дыргылеит.
Ажәытә хыбра авариатә ҭагылазаашьа аман, убри азы 2017 шықәсазы уи ықәыргеит, ахәҭакахала егьи ахыбра ҿыц аргыларагьы иалагеит. Аха аусурақәа аамҭала иаанкылан. Иҳаҩсыз ашықәс азы аҭыԥантәи ауааԥсыра аиҭашьақәыргыларатә усурақәа ирыцырҵеит.
«Ҳара ҳқыҭауаа рымчқәа рыла ахыбра аиҭашьақәыргылара рҽазыршәон.
«2017 шықәсазы, Жәлар Реизара-Апарламент ԥыхьатәи ааԥхьара адепутат Даур Голанӡиа иаԥшьгарала аҿыц хыбра аргылара иалагеит: аҭыӡқәа шьҭырхит ахыб ақәырҵеит.
2023 шықәсазы: Зураб Багаԥшь иҟаиҵаз ацхыраарала иԥхоу адашьма ықәырҵеит. Ҭенгиз Гирџьынба афымцацәаҳәақә аназго ашьаҟақәа ргылараҿы ацхыраара ҟаиҵеит», – ҳәа еиҭалҳәеит ақыҭа Ахадара аусбаҩ Альбина Дочиа.
Уи ашьҭахь ақыҭа Ахадара Жәлар Реизара-Апарламент адепутат Вахтанг Голанӡиа ишҟа ацхырара азы аҳәара ҟанаҵеит. Аиҭашьақәыргылара-ргыларатә усурақәа рхыркәшара азы ареспублиатә биуџьет аҟынтәи 2,5 млн. мааҭ инареиҳаны иазоужьхеит.
Џьгьиарда ақыҭан иаадыртыз афершал-акушерттә пункт аҿы иҟоуп ахәыҷтәы, ахаԥыцхәшәтәырҭатә, аҿыкчымазарақәа ркабинетқәа, адкыларҭа, ашьышьмаҭреи асанеибаркыреи анхамҩатәи акабинетқәеи. Араҟа аус руеит ҩыџьа амедиаҳәшьцәеи ахаԥыцхәшәтәҩи ҳақьыми. Убас ала, ақыҭауаа ҳаамҭа иақәшәо, иманшәалоу аҭагылазаашьақәа рҿы раԥхьатәи амедицинатә цхыраара рыҭаразы еиқәшәоуп.
Џьгьиарда ақыҭан иаадыртыз афершал-акушерттә пункт аиҳабы, амедиаҳәшьа Асида Амҷба ишылҳәаз еиԥш, акыр шықәса инеиԥынкыланы лара ақыҭауаа аҩны ацхыраара рылҭон, уахынлоума, ҽынлоума, аӡәгьы мап ицәымкӡакәа. Шьҭа ақыҭауаа амедицинатә цхыраара роулоит ҳаамҭа иақәшәо, иахәҭоу зегьы рыла еиқәыршәоу, иԥхоу ахыбра аҿы.
«Ҳара даараӡа ҳаигәырӷьоит ҳқыҭа ахьырхамышҭуа, ацхыраара ахьҳарҭо», – ҳәа илҳәеит лара.
Ақыҭаҿы ашколқәраанӡатәии ашколқәра иаҵанакуеи ахәыҷқәа 90-ҩык нхоит. Ахәыҷтәы медиаҳәшьа Саида Занҭариа лажәақәа рыла, ахәыҷқәа гәахәарыла амедицинатә пункт ҿыц иаҭаауеит.
«Уаанӡа ҳара ахәыҷқәа амедицинатә цхыраара рыҭаразы доусы рыҩнқәа рахь ҳцалар акәын, уажәшьҭа зегы акырӡа иманшәалахеит», – ҳәа иазгәалҭеит лара.
Ақыҭа Ахадара аусбаҩ Альбина Дочиа ақыҭа ацхыраареи ахшыҩзышҭреи азҭо зегьы иҭабуп ҳәа ралҳәеит.
Лара гәахәара дула иазгәалҭеит ааигәа аҭыԥантәи ашкол иаакәыршаны аанда ҿыц шыҟарҵаз, анапылампыли амҵәышәмпыли рыхәмаррақәа рзы ишыргылоу иҿыцу аспортә плошьадка ишаахәоу атренажерқәа.
«Аспорттә плошадка ахь аҽазыҟаҵаразы иааиуеит ахәыҷқәа реиԥш адуцәагьы», – ҳәа илҳәеит лара.
Афершал-акушертә пункт ишахәҭоу аусура азы иаҭахуп иара убас аҩнымаҭәеи архьшәашәагеи. Амедусзуҩцәа иарбоу азҵаарақәа рыӡбараҿы ацхыраара шроуа азы агәыӷра рымоуп.
