Аҟәа. Абҵарамза 6, 2024 шықәса. Аԥсныпресс. Аџьынџьуаа аԥсадгьыл ахь рырхынҳәразы Аҳәынҭқарратә Еилакы ахантәаҩы Вадим Ҳаразиа напхгара зиҭо аԥснытәи аделегациа Каир ақалақ аҿы, Египет иҟоу Урыстәыла ацҳаражәҳәаҩ Георги Борисенко иԥылеит, – ҳәа адырра ҟанаҵоит Аҳәынҭеилакы апресс-маҵзура.
Вадим Ҳаразиа Георги Борисенко изеиҭеиҳәеит аԥснытәи аделегациа Египет аҭаара хықәкы хадас иамоу атәы. Уи – Аԥснытәи акультуратә Цент Каир ақалақь аҿы аԥҵара иадҳәалоу азҵаарақәа рыӡбара ауп.
Аиԥылараҿы Египет иҟоу Урыстәыла Ацҳаражәҳәарҭа аԥснытәи аџьынџьуаа (милаҭла иаԥсыуоу Египет атәылауаа) рзы зда урҭ рҭоурыхтә ԥсадгьыл аҭааразы аҭагылазаашьақәа раԥҵара амуа атранзиттә визақәа реиқәыршәара аганахала Урыстәыла Ацҳаражәҳәарҭа ацхыраара иалацәажәеит.
Урыстәылатәи адипломат иарбоу хра злоу аус аҿы ганрацәала ацхыраара шыҟаиҵо азы иԥылаз агәра диргеит.
Аԥснытәи аделегациа анапхгаҩы аҳәаанырцә иҟоу Аԥснытәи акультуратә Центрқәа русура атәы еиҭеиҳәеит.
Аиԥылара ахыркәшамҭаз Вадим Ҳаразиа Георги Борисенко агәаларшәагатә ҳамҭа ианеишьеит.
Аԥснытәи аделегациа аилазаараҿы иҟоуп Арепатриациа азы Аҳәынҭқарратә Еилакы аиҿкаара-зинтә ҟәша аиҳабы Аслан Сангәылиа, арепатриациа Афонд адиректор ихаҭыԥуаҩ Асҭамыр Џьынџал, Ҭырқәтәыла иҟоу Аԥсны азинмчы змоу ахаҭарнак Ибрагим Аҩӡба, Аԥсны Жәлар Реизара-Аарламент адепутатцәа Рашида Аиба, Дмитри Маршьан, Венори Бебиа, Нарсоу Салаҟаиа, Инар Гыцба.
