Аминистр Аԥсны изакәанымкәа амаининг шыҟоу мап ацәикуам.

«Аӡәгьы иахьа изҳәашам Аԥсны амаининг зынӡа иҟаӡам ҳәа, аха зегьы ирыцку убри ауп, аенергетикатә система ӷәӷәала иаԥырхагоу амаининг ферма дуқәа ыҟаӡам. Ажәакала, азинхьчаратә усбарҭақәа роума, АУН «Амшынеиқәа» аума, уи аҿгақәа роума, џьарантә идуу амаининг-ферақәа рыҟазаара азы адырра ҳмоуӡацт.  Азинхьчаратә усбарҭақәеи аенергетикцәеи афымцач ахархәара аиҭаԥара аилкаара рҵахьеит», – ҳәа иҳәеит Џьансыхә Нанба.

Уи иажәақәа рыла, амаининг-фермақәа рыҟазаара аҭыԥқәа реилкаара иадҳәалоу аусура акыр имариам. 

«Аха ҳара иахьа имҩаԥааго  амониторинг ала, идуу амаининг - ферақәа ыҟаӡам ҳәа  ҿыӷәӷәала иуҳәар алшоит. Мыцхәы ирацәамкәа амаининг аппаратқәа ахьаарԥшхо аҭыԥқәа рҿы урҭ азакәантә шьаҭала амхра мҩаԥгахоит», – ҳәа иҳәеит Џьансыхә Нанба.

Иара амаининг-фермақәа рҿагылара аус аҿы адепутатцәа иҟарҵоз ацхыраарагьы атәы дазааҭгылеит. Апарламент азакәанԥҵара амаининг маругақәа рымазаара иадҳәалоу административтә зинеилагара азы ахьырхәратә уснагӡатәқәа рырџьбара азԥхьагәазҭо аиҭакрақәа аларгалеит.